Աստղագետը հնարավոր է համարում

Վատիկանի աստղադիտարանի աստղագետ, Հիսուսյան վանական Գյուի Կոնսոլմանյոն բուռն քննարկում է անցկացնում բրիտանական ԶԼՄ-ներում՝ հայտարարելով, որ ինքը չի հերքում այլ մոլորակների վրա բանական կյանքի գոյության հնարավորությունը: Եղբայր Կոնսոլմանյոն Վատիկանի գլխավոր աստղագետը չէ, սակայն մետեորիտների վատիկանյան հավաքածուի պահապանն է: Նա բացատրել է, որ խոսել է այլ մոլորակների վրա կյանքի գոյության միայն տեսական հնարավորության մասին: Նա ասել է, որ Տիեզերքի այլ մասերում եւս կարող է կյանք լինել: Նրա խոսքերով՝ բանական կյանք գտնելու եւ դրա հետ կապ հաստատելու՝ գոյություն ունեցող հնարավորությունը դնում է այդ հարցը գործնական հարթության վրա:
Հիսուսյան աստղագետը նաեւ նշել է, որ եթե բանական էակներ գոյություն ունենան Տիեզերքի այլ անկյուններում, ապա նրանց պետք է հրավիրել կաթոլիկ եկեղեցի: Ընդ որում, նա շեշտել է, որ Աստված է բոլոր արարածների, այլ ոչ միայն մարդկության արարիչը: