ՀԱՇՎԵԼ Է ԱՏԱՄՆԵՐԸ

ԵԽԽՎ-ում Հայաստանի պատվիրակության անդամ Նաիրա Զոհրաբյանը երեկ Ստրասբուրգից հեռախոսով «Առավոտին» հայտնեց. «Մոտեցա Գորան Լինդբլադին եւ հարցրի՝ երեւի շատ ծա՞նր եք տանում, որ չեք ընտրվել Շվեդիայի խորհրդարանի պատգամավոր: Պատասխանեց, թե ծանր չէ, բայց ամեն դեպքում՝ լավ չի զգում»: Հիշեցնենք, որ Շվեդիայի խորհրդարանում չվերընտրվելով՝ պրն Լինդբլադը նաեւ դուրս է մնալու ԵԽԽՎ-ում Շվեդիայի պատվիրակությունից: Նաիրա Զոհրաբյանը պատմեց. «Ասացի՝ Ձեր տրամադրությունը բարձրացնելու համար մի խորհուրդ տամ: Գիտեմ, որ դառնալով Հայաստանի հարցով համազեկուցող՝ շատ լուրջ պարտավորություններ եք ստանձնել ձեր պատվիրատու որոշ երկրների հանդեպ: Քանի որ որպես համազեկուցող այլեւս դժվար հասցնեք պարտքը հատուցել՝ լավագույն տարբերակն եմ առաջարկում. ատամնաբույժ եք՝ անվճար բուժեք ձեր պատվիրատու անդամ երկրների պատվիրակություններին: Գորան Լինդբլադը պատասխանեց, թե միշտ պատրաստ է թե՛ որպես ատամնաբույժ, թե՛ որպես ժողովրդավար աջակցություն ցույց տալ բոլոր երկրներին»: