«Նոր Ժամանակներ» կուսակցության նախագահ Արամ Կարապետյանը երեկ մամուլի ասուլիսում հայտարարել է, թե հայ-թուրքական հարաբերությունների կարգավորման գործընթացը դեռ շարունակվում է, եւ ԱՄՆ-ը ձգտում է «Ցյուրիխ-2» ծրագիրն իրականացնել։ «Հիմա Հովիկ Աբրահամյանին կանչել են Շվեյցարիա։ Այսպես ասած՝ «մշակում է գնում»՝ «Ցյուրիխ-2»-ի նախապատրաստումը. խորհրդարան կբերեն պայմանագրերը, կընդունենք։ Հիմնական նպատակն այն է, որ նույն բանն իրականացնեն, բայց իմ տվյալներով՝ մեջն ավելացրած է տնտեսական մաս՝ ազատ տնտեսական գոտիների ստեղծում, առեւտուր, փող։ Ասում են՝ դուք կտաք, այսպես կոչված, «օկուպացված» շրջանները, դրանից հետո սահմանները կբացվեն, բայց դրա համար փող էլ կտանք»։ Պատասխանելով հարցին, թե ո՞ւմ հավատալ՝ ՀՀ ԱԳՆ մամուլի խոսնակի՞ն, ով հերքել է հայ-թուրքական գաղտնի բանակցությունների փաստը, թե՞ Շվեյցարիայի արտգործնախարարին, ով հակառակն է պնդում՝ Արամ Կարապետյանն ասել է. «Ես, իհարկե, մարդկանց չեմ ուզում վիրավորել, բայց եկեք սպասենք, տեսնենք՝ Շարմազանովն ի՞նչ է ասելու, որովհետեւ մեզ մոտ, ինչպես միշտ, ամեն ինչ ասում է Շարմազանովը։ Իսկ Գալուստ Սահակյանը վերջինն է. երբ որ հասկանում են, որ Շարմազանովի ասածը չհասկացան, այդ ժամանակ գալիս է Գալուստ Սահակյանը»։
