Մինչ թուրք ազգայնականները նամազ էին կազմակերպում Անիի Մայր տաճարում, Թուրքիայի տարածքում գտնվող մեկ այլ եկեղեցում՝ Աղթամարի Սուրբ Խաչում, վերջապես տեղադրվեց խաչը: Այդ մասին տեղեկացնում է «Ազատություն» ռ/կ-ն: Սեպտեմբերի 30-ի գիշերը Վանի Աղթամար կղզու Սուրբ Խաչ եկեղեցու գմբեթին տեղադրվել է այն խաչը, որի բացակայության պայմաններում սեպտեմբերի 19-ին, ավելի քան 95 տարի դադարից հետո, առաջին անգամ այդ եկեղեցում պատարագ մատուցվեց: Թուրքիայում լույս տեսնող «Ակոս» թերթի խմբագիրներից Արիս Նալջիի փոխանցմամբ, այսօր առավոտյան լրագրողների բավական մեծ մի խումբ պետք է գնա եւ լուսանկարի այն, իսկ Պոլսո Հայոց պատրիարքի փոխանորդ Արամ սրբազան Աթեշյանը Սուրբ Խաչ եկեղեցում արարողություն կիրականացնի:
Արիս Նալջին հնարավոր չի համարել խաչը հետագայում եկեղեցու գմբեթից նորից հանելու հնարավորությունը, բայց նշել է, որ իրենց համար առավել կարեւոր է, թե խաչի տեղադրումից հետո այնտեղ կկարողանա՞ն կանոնավոր կերպով ամեն կիրակի պատարագ մատուցել, թե՞ ոչ:
