Վերջերս Երեւան է ժամանել Հայկական բարեգործական ընդհանուր միության Արգենտինայի մասնաճյուղի կանանց միության անդամներից բաղկացած պատվիրակությունը: Նախկինում նրանք շատ այցելություններ են ունեցել հայրենիք, սակայն այս մեկը ոչ պաշտոնական էր: Ինչպես նշեց կանանց միության նախագահ տիկին Դիանա Սարաֆյանը՝ «Այսպիսի այցելությունները ավանդույթ են դարձել, հույս ունենք, որ հաջորդ տարի մեզ կմիանան ուրիշ հայրենասերներ եւս»: Պատվիրակության մեջ կան նաեւ արգենտինացիներ, ովքեր ցանկություն են հայտնել լինել Հայաստանում, ճանաչել Հայաստանի մշակույթը եւ իմանալ հայոց պատմության մասին:
Առաջին հանդիպումը ՀԲԸՄ երեւանյան գրասենյակում էր, որտեղ տիկնանց ընդունեց ՀԲԸՄ հայաստանյան գրասենյակի ղեկավար Աշոտ Ղազարյանը: Նա հյուրերին ուղեկցեց նաեւ Հայկական վիրտուալ համալսարան, պատմեց համալսարանի գործունեության եւ արդյունքների մասին: Հյուրերը այցելել են Ծիծեռնակաբերդ, Եռաբլուր: Կանանց միությանը Մայր աթոռ սուրբ Էջմիածնում ընդունել է Ն.Ս.Օ.Տ.Տ. ամենայն հայոց կաթողիկոս Գարեգին Բ-ն, նշել, որ բարձր է գնահատում ՀԲԸՄ-ի դերը եկեղեցաշինության, հայապահպանության գործում: Տիկնայք այցելել են Արմավիրի մարզ, շրջել արգենտինահայ գործարար Էդուարդո Էռնեկյանին պատկանող խաղողի պլանտացիաներով:
