Երեւանի քաղաքապետարանը երեկ ընդունած իր որոշմամբ արգելել է Հայ ազգային կոնգրեսի՝ հոկտեմբերի 15-ին Ազատության հրապարակում հանրահավաք եւ երթ անցկացնելու մասին իրազեկումը: Քաղաքապետարանը, սովորության համաձայն, Կոնգրեսին առաջարկել է հանրահավաքն անցկացնել Մատենադարանին հարող տարածքում, իսկ ահա երթի մասին իրազեկումը ի գիտություն է ընդունել: Իր այս որոշումը քաղաքապետարանը հիմնավորել է նրանով, որ հրապարակում այդ օրն ու այդ ժամին «երեխաների հանգիստն ու ժամանցն ապահովող միջոցառումը բացառում է միաժամանակ նույն տարածքում հանրահավաքի անցկացումը»: Խոսքը Ազատության հրապարակի վերաբացումից հետո այնտեղ տեղադրված ատրակցիոնների մասին է:
