![\"\"](\"https://www.aravot.am/2010/aravot_arm/September/28/p10.jpg\")
«Առավոտի» այս տարվա հունիսի 3-ի համարում՝ «Առայժմ կարմիր լույս «Այրում» կայարանում» հրապարակմամբ ներկայացրել ենք հանրապետության հյուսիս-արեւմտյան մուտքը հանդիսացող երկաթուղային կայարանի ոչ այնքան բարվոք վիճակը: Այժմ ավելի է վատացել: Երկաթուղային «Այրում» կայարանը միջպետական մայրուղուն եւ Այրում քաղաքին կապող ավտոմոբիլային միակ կամուրջը կիսավթարային է: Կամրջի բազրիքը քանդվել է եւ արդեն բուն կամուրջն է քայքայվում: Քայքայված վիճակում է նաեւ կամրջի ասֆալտե ծածկը: Այրումի քաղաքապետ Գիգոլ Եգանյանը հայտնեց, որ կառույցը քաղաքապետարանի հաշվեկշռում չէ: Առանց այս կամրջի՝ «Այրում» կայարանի գոյությունն անիմաստ է, ուրեմն, ըստ ամենայնի, կամրջի նորոգումը պետք կատարի Հարավկովկասյան երկաթուղային ընկերությունը: Սակայն այսօր ռուսական այդ ընկերությունը «Այրում» կայարանի աշխատողների կրճատումներ է անում, ինչը հանգեցրել է տասնյակ տարիների աշխատանքային ստաժ ունեցող երկաթուղայինների դժգոհությանը:
