ՀԱԿ ՆԵՐԿԱՅԱՑՈՒՑԻՉԸ ՀԱԿԱԴԱՐՁՈՒՄ Է ՔՆՆԱԴԱՏՆԵՐԻՆ

Հայ ազգային կոնգրեսի ներկայացրած ԼՂ վերաբերյալ մշակած բանաձեւի նախագիծը, որն առաջարկվում էր ՀՀ անունից ներկայացնել ՄԱԿ-ում, սուր քննադատության ենթարկվեց: Այդ նախաձեռնության դեմ հիմնական փաստարկն այն էր, որ դա հակասում է ՀՀ արտաքին քաղաքական ուղեգծին, եւ որ ՄԱԿ-ում ԼՂ-ին առնչվող որեւէ փաստաթուղթ ներկայացնել չի կարելի, որովհետեւ դրա արդյունքում կարող է փոխվել խնդրի կարգավորման ձեւաչափը, ինչը վտանգավոր է: Այս քննադատություններին ՀԱԿ-ի բանաձեւի համահեղինակ Վլադիմիր Կարապետյանը հակադարձեց՝ ասելով, թե ադրբեջանական բանաձեւերին դիմագրավելու՝ ՀՀ ԱԳՆ-ի համար ամենաարդյունավետ ճանապարհը տարիներ շարունակ եղել է ոչ թե վերոնշյալ պնդումը, այլ հենց քննարկումների նախնական փուլերում հայկական բանաձեւերի նախագծերի ներկայացումը: «Դա եղել է մեր արտաքին գերատեսչության որդեգրած մարտավարության մի մասը: Այդ քայլերով ենք մենք կարողացել տարիներ շարունակ չեզոքացնել ադրբեջանական նախաձեռնությունները ոչ միայն ՄԱԿ-ում, այլեւ միջազգային այլ կազմակերպություններում»,- ասաց նախկին դիվանագետը:
Կարդացեք