![\"\"](\"https://www.aravot.am/2010/aravot_arm/September/24/p5.jpg\")
Երեկ տեղեկացրել ենք, որ Սյունիքի մարզպետ, քրեական պատմություններից անպակաս Սուրիկ Խաչատրյանը նորոգում է մարզպետարանի շենքը: Պարզեցինք նաեւ, որ նրա նախաձեռնությամբ երեկ տեղահան են արվել մարզպետարանի դիմացի 14-15 տարեկան արծաթափայլ եւ երկնագույն ավելի քան մեկ տասնյակ եղեւնիները: Այս ծառերը տնկվել էին Սյունիքի առաջին մարզպետ Սուրեն Աբրահամյանի օրոք: Ըստ մարզպետարանի պաշտոնական վարկածի, եղեւնիները հանվել են, քանզի չորանում էին, կտեղափոխվեն նոր վայր ու կխնամվեն: Ըստ մասնագետների, սակայն, 15 տարեկան արծաթափայլ կամ երկնագույն եղեւնիները նոր տեղում չեն աճելու, չորանալու են: Առնվազն զարմանալի եւ տարօրինակ է, որ 15 տարի կանաչ ու փարթամ ծառերը իբր չորանալ սկսեցին հենց այն պահին, երբ Սուրիկ Խաչատրյանը որոշեց նորոգել մարզպետարանը: Մյուս կողմից էլ՝ եթե մարզպետի ու մարզպետարանի «քթի տակի» ծառերն են այնքան անտեր, որ չորանում են, ապա դժվար չէ հասկանալ, թե ինչու են դատարկվում Սյունիքի գյուղերը («Առավոտ», 22.04.2010 «Կանխել Սյունիքի գյուղերի ամայացումը»): Իսկ Սուրիկ Խաչատրյանը շարունակում է պաշտոնավարել:
