Երեկ ԿԳՆ-ում անցկացվեց հայոց եկեղեցու պատմություն, հայոց լեզու եւ գրականություն, հայոց պատմություն, ֆիզիկա, քիմիա, կենսաբանություն առարկաների ուսուցիչների մրցույթի հանրապետական փուլը: Հայ առաքելական եկեղեցու եւ ԿԳՆ-ի համագործակցությամբ անցկացվող այս մրցույթն իրականացվում է 2003-ից, որի շրջանակներում 300-ից ավելի ուսուցիչներ արժանացել են մրցանակների: Այս տարի հանրապետական փուլին մասնակցում է 42 ուսուցիչ, ովքեր իրենց գիտելիքների աստիճանը կփորձեն ուսուցչի ստեղծագործական եւ մանկավարժական կարողությունները գնահատող թեստային առաջադրանքների, տվյալ առարկայի դասավանդման կատարելագործման ուղղությամբ առաջարկությունների միջոցով, «կլոր սեղան» բանավեճերի ընթացքում: Յուրաքանչյուր առարկայի համար սահմանված է առաջինից երրորդ մրցանակներ, որոնց հանձնման արարողությունը տեղի կունենա Մայր աթոռ սուրբ Էջմիածնում:
