Երեկ, մամուլի ասուլիսում, Հմայակ Հովհաննիսյանը ՕԵԿ նախագահ Արթուր Բաղդասարյանի հասցեին որոշ գնահատականներ էր հնչեցրել, որին անմիջապես արձագանքեց Հեղինե Բիշարյանը: Զարմանալի օպերատիվությամբ Հմայակ Հովհաննիսյանն էլ իր հերթին հակադարձեց տիկին Բիշարյանին: ՕԵԿ խմբակցության անդամ Հովհաննես Մարգարյանը երեկ, ի ամփոփումն այս ամենի, «Առավոտին» փոխանցեց հետեւյալը. «Առիթներ ունեցել եմ բազմաթիվ անգամ Հմայակ Հովհաննիսյանին որոշ դեպքերում՝ նույնիսկ իր ներկայությամբ, հրապարակայնորեն ապացուցելու, որ հայրենի քաղաքական դաշտում իր եւ իր նմանների առաքելությունը եղել եւ մնում է իրականացնել, իր կարծիքով, քաղաքական «ազդեցիկ պապաների» պատվերներն ու նվաստ հանձնարարականները եւ, արդյունքում վերածվելով քաղաքական օգտագործած հնամաշ գործիքի, հաճախ է ցուցադրել իր սուր եւ բութ որակները՝ վերջնականապես հայտնվելով քաղաքական բոմժի կարգավիճակում: Տո այ Հմայակ, դու ուր, 13-ամյա ՕԵԿ-ն ուր, ոնց որ Մասիս սարը եւ թոփի դարը»:
