Աֆղանստանի ոստիկանությունը ստիպված է եղել օդ կրակել՝ Քաբուլում սկսված հակաամերիկյան բողոքի բազմահազարանոց հանրահավաքը ցրելու համար: BBC-ն, վկայակոչելով ականատեսներին, փոխանցում է, թե արդյունքում մեկ մարդ զոհվել եւ առնվազն հինգը վիրավորվել է: Ցուցարարները հակաամերիկյան եւ քրիստոնյաների ու նաեւ երկրի նախագահ Համիդ Քարզայի դեմ ուղղված կարգախոսներ են հնչեցրել:
Աֆղանական ոստիկանության փոխանցմամբ, չորեքշաբթի օրը Քաբուլի փողոցներ է դուրս եկել ավելի քան 10 հազար ցուցարար, որոնց մի մասը «Թալիբան» շարժման դրոշներ է պարզել:
Անցած շաբաթ, այն բանից հետո, երբ ամերիկացի քահանան հայտարարել էր Ղուրանն այրելու իր մտադրության մասին, Աֆղանստանում անկարգություններ էին սկսվել: Բողոքի ներկայիս ակցիաները տեղի են ունենում Աֆղանստանում սպասվող խորհրդարանական ընտրությունները տապալելու մասին թալիբների խոստման ֆոնին:
