Ասում է ԱԻՄ նախագահ Պարույր Հայրիկյանը
«Գյումրիում ռուսական ռազմաբազայի ժամկետի երկարաձգման երկկողմ պայմանագիրը հերթական թակարդն է Հայաստանի համար». կարծիքի հեղինակը ԱԻՄ նախագահ Պարույր Հայրիկյանն է: Երեկ նա այն հնչեցրեց Մամուլի ազգային ակումբում: «Դեռեւս 1995 թվականին կնքված պայմանագրում կա մի բացթողում, որն արվել է միտումնավոր»,- հավելեց Հայրիկյանը՝ պարզաբանելով, որ բացթողումն այն է, որ պայմանագրում չի նշվել, թե ինչ պայմաններով կարող է դադարեցվել այդ համագործակցությունը։ Մինչդեռ վկայակոչելով միջազգային փորձը՝ նա ընդգծեց, որ երկարաժամկետ պայմանագրերն առանց դադարեցման հնարավորության չեն կնքվում։ Այնուհանդերձ, «դառն իրականությունը» չի մթագնել քաղաքական գործչի իմաստնությունը, եւ հայ-ռուսական այդ պայմանագրում նաեւ դրական կողմեր է տեսնում, մասնավորաբար՝ այն, որ ըստ պայմանագրի, կողմերին չի արգելվում համագործակցել այլ կառույցների հետ: ԱԻՄ առաջնորդը դեմ չէ հայ-ռուսական հարաբերություններին, ինչպիսին դրանք անկախության առաջին տարիներին էին: Այդ ժամանակ, Հայրիկյանի համոզմամբ, Ռուսաստանը չէր առաջնորդվում բացառապես իր շահերով, այլ՝ արժեքներով: Բանախոսի կարծիքով՝ Ռուսաստանը Հայաստանի ոչ թե անվտանգության, այլ վտանգավորության երաշխավորն է. «Եթե հիշենք վերջին մի քանի հարյուրամյակը, ապա հայ ժողովրդի բոլոր փորձանքները եկել են Ռուսաստանից»:
ԱԻՄ առաջնորդի հրավիրած մամուլի ասուլիսի հիմնական թեման ՀՀ անկախությունն էր՝ Անկախության առաջիկա տոնի համատեքստում: Ավանդույթի համաձայն, Հայրիկյանն այդ առիթով երեկ էլ բարձրաձայնեց իր դատողությունները, գովերգեց ու փառաբանեց անկախության գաղափարը եւ անկախության մարտիկների շարքում գովասանքի ամենամեծ բաժինը, բնականաբար, հատկացրեց ԱՄԿ ժառանգորդ ԱԻՄ-ին ու ԱԻՄ անկրկնելի ղեկավարին՝ ի դեմս իրեն: Լրագրողների խնդրանքով անդրադառնալով հայկական բանակում վերջին շրջանում տեղի ունեցող իրադարձություններին՝ մասնավորաբար, ինտերնետում հայտնված վերջին տեսահոլովակին՝ անկախության մարտիկը նկատեց, որ այս ամենը անկախությունից, ժողովրդավարությունից եւ բաց հասարակությունից հեռանալու հետեւանքներն են։
