Կառավարությունը երեկ վերջապես կատարեց գազի թանկացման ազդեցությունը մեղմելու իր խոստումը: Երեկվա նիստում որոշվեց վերաբաշխում կատարել այս տարվա պետբյուջեում եւ նպաստառու ընտանիքներին լրացուցիչ ընտանեկան նպաստ ու միանվագ դրամական օգնություն տրամադրելու նպատակով հատկացվեց 367,582.8 հազար դրամ: Վարչապետ Տիգրան Սարգսյանը նշեց, որ այս քայլով ամբողջությամբ իրականացվում է այս տարվա մայիսից գազի սակագնի բարձրացման հետեւանքով բնակչության խոցելի խավերի ծախսի փոխհատուցումը։ Ավելացվել են 104 հազար ընտանիքների սոցիալական նպաստները, իսկ նոյեմբերի 1-ից թոշակառուները կստանան ավելի բարձր թոշակներ։ Կառավարության մեկ այլ որոշումով էլ սեպտեմբերի 20-ը՝ կլինի ոչ աշխատանքային օր, փոխարենը կաշխատեն սեպտեմբերի 11-ին՝ շաբաթ օրը:
