Կառավարությունը երեկ հավանություն է տվել «Հարկերի մասին» եւ ՀՀ եւս 5 օրենքներում փոփոխություններ եւ լրացումներ կատարելու օրենքների եւ նախագծերի փաթեթին, որով առաջարկվում է սահմանել, որ հարկ վճարողի կողմից ներկայացված բողոքները կքննարկվեն ֆինանսների նախարարությունում: Ինչպես նիստի ժամանակ ասաց ֆինանսների նախարար Տիգրան Դավթյանը. «Այս բարեփոխումների նպատակը միջգերատեսչական գանգատարկման հանձնաժողովի ձեւավորումն է, որը կհանդիսանա լրացուցիչ մարմին, որտեղ հարկատուներն իրենց բողոքները կներկայացնեն, առաջարկվող համակարգը մեկ քայլ առաջ է, որը հնարավորություն կտա միջազգային չափանիշներին համապատասխան համակարգ ստեղծել»: Սակայն ՊԵԿ նախագահ Գագիկ Խաչատրյանն առաջարկեց նախագիծը մանրամասն քննարկել. «Պարոն վարչապետ, այն, հիմա ինչ ուզում ենք անել՝ աշխարհի ոչ մի երկրում չի կիրառվում, միջազգային այսպիսի պրակտիկա չկա եւ այստեղ ավելի լուրջ խնդիրներ եմ տեսնում»: 2 միլիոն դրամ էլ, գործադիրի որոշմամբ, հատկացվեց պետական գնումների ոլորտում ներդրված էլեկտրոնային համակարգը կատարելագործելու համար:
