Երեկ Հայաստանի գրողների միությունում կայացավ ՀԳՄ նախագահ Լեւոն Անանյանի եւ Գերմանիայի Սաքսոնիա-Անհալթ երկրամասի գրողների «Ֆրիդրիխ Բոդեքեր» միության նախագահ Յուրգեն Յանկովսկու հանդիպումը: Ստորագրվեց համաձայնագիր, որ միտված է մշակութային կապերի հաստատմանը: Ըստ Լ. Անանյանի, վերջին տարիներին ՀԳՄ մշակած քաղաքականության արդյունքում կփորձեն միջազգայնացնել հայ գրականությունը, ստեղծել կապեր եվրոպական երկրների հետ: «Վերջին երկու տարիներին շատ աշխույժ գրական համագործակցության մեջ ենք մասնավորապես Ռուսաստանի Դաշնության, Վրաստանի, Ռումինիայի, ինչպես նաեւ Իրանի Հանրապետության հետ»,- ասում Լ. Անանյանը եւ ներկայացնում Գերմանիայից ժամանած գործընկերոջը:
Լ. Անանյանի փոխանցմամբ, Յանկովսկին արդի նշանավոր գրողներից է, արձակագիր, բանաստեղծ, բազմաթիվ գրքերի հեղինակ: Նա առաջին անգամ է Երեւանում: Այցի նպատակը փոխծանոթությունն է, նրա ստեղծագործություններից մի քանիսը արդեն տպագրվել է «Արտասահմանյան գրականություն» հանդեսում: ՀԳՄ նախագահն ասում է, որ Եվրոպայում տարածված են գրական ընթերցումները: Եվ այդ ավանդույթը Հայաստանում էլ պետք է կարողանանք արմատավորել:
Այսօր Ավ. Իսահակյանի անվան գրադարանում կկայանա Յուրգեն Յանկովսկու հետ հանդիպում, գրողը կայցելի տեսարժան վայրեր, մշակութային օջախներ:
Հայ գործընկերներին ողջունելուց եւ համաձայնագիրը ստորագրելուց հետո պարոն Յանկովսկին ասաց. «Ուրախ եմ, որ գտնվում եմ այստեղ: Գերմանիայում շատ ցուրտ է, իսկ Հայաստանում՝ իսկական ամառ: Երեւանում ես ինձ լավ եմ զգում: Հասցրել եմ լինել Մատենադարանում եւ ծանոթանալ հին ձեռագրերի հետ: Այստեղ եմ ոչ թե գեղեցիկ ամառվա համար, այլ այն նպատակով, որ միմյանց ավելի լավ ճանաչենք, հայ գրողներին թարգմանենք գերմաներեն, գերմանացիներին՝ հայերեն»:
