Հինգշաբթի օրը, Տաջիկստանի մայրաքաղաք Դուշանբեից 30 կմ հեռավորության վրա գտնվող Ռամիտ տեղանքում կատաղի փոխհրաձգություն է ընթացել կառավարական ուժերի եւ բանտից փախուստի դիմած կալանավորների միջեւ: BBC-ի մատուցմամբ, կալանավորներից չորսը շրջափակման մեջ է հայտնվել, մեկը ձերբակալվել է:
Հիշեցնենք, որ օգոստոսի 23-ին Դուշանբեում Ազգային անվտանգության պետական կոմիտեի մեկուսարանից փախուստի էր դիմել ծանր հանցագործությունների մեջ մեղադրվող 25 կալանավոր:
Փորձագետների դիտարկմամբ, օրերս ԱԱՊԿ-ում տեղի ունեցած կադրային փոփոխություններն ուղղակիորեն կապված էին այդ փախուստի հետ, թեեւ դրանց պատճառը պաշտոնապես չի նշվում: Երկրի նախագահ Էմոմալի Ռախմոնի հրամանագրով աշխատանքից հեռացվել էին հատուկ ծառայության ղեկավար Խայրիդդին Աբդուռախիմովն ու պատասխանատու պաշտոններ զբաղեցրած մի քանի աշխատակիցներ:
