Ազատության պողոտայում երեկ կեսօրից հետո խցանումներն այնքան էին «երկարել», որ վարորդներն արդեն հայհոյում էին այդտեղ աշխատող բանվորներին: Խցանումներից տուժած Աղասի Արշակյանն էլ «Առավոտին» դժգոհեց, որ Հաղթանակի զբոսայգուց մինչեւ Բաբայան խաչմերուկ է հասել մոտ 1 ժամում: Նրա պատմելով՝ այդ լայն փողոցում, ընդամենը 1 մեքենայի ճանապարհ էին թողել. «Ոչ էլ հասկացանք, թե ինչ շինարարություն էր՝ մալուխնե՞ր էին փոխում, թե՞ ջրագծեր: Արդեն այն աստիճան էին վարորդները զայրացել, որ էդ շինարարությունն իրականացնողների նախնիներին ամենավատ ձեւերով հիշեցին: Երբ հետաքրքրվեցինք, թե ի՞նչ են անում եւ ո՞վ է նրանց թույլ տվել ցերեկով այսպիսի խցանումներ սարքել, աշխղեկն ասաց՝ ռայսովետն ա թույլ տվել»: Պարոն Արշակյանին ավելի շատ զայրացրել էր այն հանգամանքը, որ խցանման հատվածում, որտեղ գտնվում է «Golden palace» հյուրանոցը՝ բազմաթիվ օտարերկրացիներ են ապրում. «Ի՞նչ կմտածեն նրանք: Այդ խցանումներ կազմակերպողը ռայսովետ ա, թե թաղապետարան, թե մեկ այլ կառույց, եթե չի մտածում սեփական հեղինակության մասին, գոնե պետության հեղինակության մասին մտածեն»:
