Օպերայի մոտ բախվել են «Յագուարն» ու տաքսին

Երեկ, ժ. 19:30-ի սահմաններում, Ֆրանսիայի հրապարակում միմյանց են բախվել «Յագուար» մակնիշի 40 UP 001  համարանիշի  եւ «2107» մակնիշի Լ 0114 համարանիշի ավտոմեքենաները: Տեղի ունեցած վթարից հետո «Յագուարի» վարորդը մեքենան թողնելով դեպքի վայրում՝  դիմել էր փախուստի, սակայն ճանապարհային ոստիկանության աշխատակիցներին հաջողվել էր «փախստականին» բռնել Մոսկովյան փողոցում: «07»-ի վարորդն ու ուղեւորը տեղափոխվել են հիվանդանոց: «Առավոտի» տեղեկություններով, «Յագուարի» վարորդ Արթուր Զուլումյանը դատական դեպարտամենտի առաջին բաժնի մասնագետ է: Ըստ ամենայնի, կասկածելով, որ Զուլումյանը ղեկին եղել է ոչ սթափ վիճակում, ոստիկանության աշխատակիցները նրան իրենց ծառայողական մեքենայով տարել են Ավանի նարկոլոգիական դիսպանսեր՝ նրա կողմից ալկոհոլ օգտագործած լինել-չլինելու հանգամանքը ստուգելու համար: Լուսանկարներում  պատկերված են Զուլումյանի «Յագուարը» եւ վկայականը: