«Regnum» գործակալության փոխանցմամբ, մարզական փորձի փոխանակման ծրագրի շրջանակներում, NBA-ի նախկին խաղացող Ջորջ Մուրեսանը օգոստոսի 19- 29-ը Թուրքիայում մարզում է հայ եւ թուրք 24 երիտասարդ բասկետբոլիստների: Այս տեղեկատվությունը գործակալությանը տրամադրել է Հայաստանում ԱՄՆ-ի դեսպանատան մամուլի ծառայությունը: Ըստ այդմ, նախագիծը ֆինանսավորում է ԱՄՆ-ի պետդեպարտամենտի «Միասնական սպորտ» ծրագիրը, որն էլ իրականացնում է «World Learning» ընկերությունը:
Մեկնարկելով մեկշաբաթյա ճամբարով՝ ծրագրի մասնակիցները երկրորդ շաբաթում այցելելու են Իզմիր, որտեղ հանդես են գալու ցուցադրական ելույթներով: Նրանք նաեւ մասնակցելու են FIBA-ի՝ բասկետբոլի աշխարհի առաջնության բացման միջոցառումներին:
Նույն երիտասարդ բասկետբոլիստները 2011 թվականին կմեկնեն ԱՄՆ եւ կմարզվեն ամերիկացի բասկետբոլիստների հետ:
