Թուրքիայում եւ Ադրբեջանում ԱՄՆ-ի դեսպանների պաշտոնները դեռ որոշ ժամանակ կարող են թափուր մնալ՝ սենատորների շարունակվող վետոյի պատճառով: Այդ մասին, news.am-ի մատուցմամբ, գրում է թուրքական Hurriyet Daily News-ը: Թեեւ ամերիկացի եւ թուրք դիվանագետները մասնավոր զրույցներում խոստովանում են, որ Անկարայում դեսպանի պաշտոնում առաջադրված Ֆրենսիս Ռիկարդոնեի թեկնածությունը արգելափակած հանրապետական սենատորը սեպտեմբերին կարող է փոխել իր որոշումը, բայցեւ միաժամանակ ընդունում են, որ Ադրբեջանում Միացյալ Նահանգների դեսպանի թեկնածու առաջադրված Մեթյու Բրայզայի դեպքում իրավիճակը կարող է ավելի բարդ լինել:
Սենատում, ըստ աղբյուրի, հայամետ խմբերն ի սկզբանե հանդես են եկել Բրայզայի դեմ՝ նրան մեղադրելով Թուրքիայի եւ Ադրբեջանի իշխանությունների հետ սերտ կապեր պահպանելու մեջ:
