2010-2011 ուսումնական տարին նախապատրաստված սկսելու, հանրակրթական դպրոցների ուսուցիչներին եւ տնօրեններին անհրաժեշտ մեթոդական օգնություն կազմակերպելու նպատակով ՀՀ ԿԳ նախարար Արմեն Աշոտյանը հրաման է ստորագրել ՀՀ մարզերում եւ Երեւան քաղաքում հանրակրթական դպրոցների մանկավարժների օգոստոսյան խորհրդակցություններ անցկացնելու վերաբերյալ: Համաձայն հրամանի՝ օգոստոսի 25-30-ը մարզերում եւ Երեւան քաղաքում կկազմակերպվեն ու կանցկացվեն ուսուցիչների եւ տնօրենների օգոստոսյան խորհրդակցություններ: Հանրակրթական դպրոցների տնօրենների հետ հանդիպման եւ խորհրդակցություններին մասնակցելու, տեղում իրավիճակին ծանոթանալու եւ չլուծված խնդիրների վերաբերյալ առաջարկություններ մշակելու նպատակով կազմվել է ժամանակացույց, համաձայն որի՝ ՀՀ կրթության եւ գիտության նախարար Արմեն Աշոտյանը օգոստոսի 25-ին կմասնակցի Գեղարքունիքի, օգոստոսի 26-ին՝ Կոտայքի մարզերում, իսկ օգոստոսի 30-ին՝ Երեւանում կազմակերպվող խորհրդակցություններին: ՀՀ մարզեր կգործուղվեն ՀՀ ԿԳ նախարարի տեղակալ Մ. Մկրտչյանը, Կրթության ազգային ինստիտուտի տնօրեն Ն. Ղուկասյանը եւ ԿԳ նախարարության պատասխանատուները: Համաձայն հրամանի՝ ՀՀ բոլոր մարզերում առարկայական սեկցիոն պարապմունքներ անցկացնելու նպատակով Կրթության ազգային ինստիտուտի մասնագետների ներգրավմամբ կազմավորվել է երեք խումբ:
