![\"\"](\"https://www.aravot.am/2010/aravot_arm/august/25/p12.jpg\")
ՀՀ Սփյուռքի նախարարության, ՀՀ կենտրոնական բանկի եւ Հայաստանի բանկերի միության համատեղ ջանքերով ընթացիկ տարվա հոկտեմբերի 17-19-ը Երեւանում կազմակերպվելու է Ֆինանսիստների եւ բանկիրների համահայկական առաջին համաժողովը:
Ըստ համաժողովի կազմկոմիտեի, հավաքի նպատակն է ֆինանսիստների եւ բանկիրների համահայկական ընկերակցության ստեղծման միջոցով նպաստել հայ ֆինանսիստների եւ բանկիրների համագործակցության ակտիվացմանը:
Հիշեցնենք, որ ուսուցիչների համահայկական հավաք այս տարի անցկացվեց արդեն չորրորդ անգամ: Այս տարի կազմակերպվեց նաեւ կերպարվեստի հայ գործիչների համաժողով: Անցած տարի ՀՀ Սփյուռքի նախարարության նախաձեռնությամբ անցկացվեցին իրավաբանների եւ ճարտարապետների համահայկական առաջին համաժողովները:
Այս ոլորտներում համագործակցության էական աճ դեռ տեսանելի չէ: Բայց տեղեկացրել ենք, որ դրսից ժամանած ճարտարապետների քննադատությունը ՀՀ գլխավոր ճարտարապետ Նարեկ Սարգսյանի համար հետեւություններ անելու համար չէ: «Խոսքը չի գնում հետեւություններ անելու մասին: Ֆորումի նպատակն է՝ մեր գործընկերների աչքերով ընկալել Երեւանը: Դա մեզ կօգնի կողքի աչքերով հասկանալ, ի վերջո, ուր ենք հասել: Այդ կարծիքները մեզ հնարավորություն կտան շատ ավելի զգոն լինել»,- համաժողովից հետո մեր թղթակցին ասել էր Նարեկ Սարգսյանը («Առավոտ», 20.04.2009՝ «Ընդամենը կողքի աչք»):
Համաժողովներից հետո, ՀՀ Սփյուռքի նախարար Հրանուշ Հակոբյանի նախաձեռնությամբ, ճարտարապետների համաժողովին մասնակցած ֆրանսահայ քանդակագործ Թորոս Ռասքելենյանը Հայաստանին նվիրեց իր «Սայաթ-Նովա» արձանը, որը տեղադրվեց Երեւանի Սայաթ-Նովայի եւ Խանջյան փողոցների խաչմերուկում: Սրանից բացի, Հրանուշ Հակոբյանը սփյուռքահայ ճարտարապետներին հրավիրեց մասնակցելու «Աշխարհի քաղաք» վիրտուալ ծրագրի մշակմանը, որով Հայաստանը ներկայացել է Չինաստանի Շանհայ քաղաքում բացված «EXPO-2010» միջազգային ցուցահանդեսին:
