ՌԴ նախագահ Մեդվեդեւի Հայաստան գալը համատարած ասֆալտապատումների ու բարեկարգումների տեղիք է տվել: Ինչ վերաբերում է Երեւանի ծայրամասերից մեկում՝ Ներքին Չարբախում տեղ-տեղ մեկնարկած ասֆալտապատմանը, բնականաբար՝ ՌԴ նախագահի այցի հետ կապ չունի: Ուղղակի մաշված նախընտրական խոստումներ են մասնակիորեն իրականացվում: Քաղաքապետարանը կամ Շենգավիթի թաղապետարանը որոշել է լավ բան անել, բայց ստացվել է՝ ինչպես միշտ: Նախ ասֆալտի շերտն այնքան բարակ է՝ 2 սմ, որ արդեն սկսել է քանդվել, իսկ 4-րդ փողոցում ասֆալտապատողները մի 5 մետրի չափով ուղղակի «փափախ» են արել: Բնակիչներն են ճարահատյալ սեփական նախաձեռնությամբ հին ասֆալտի մնացորդներ լցրել, որ նրանց կիսատ թողածը գոնե այդ կերպ շտկվի: Բնակիչները կատակում են, թե հաստատ Ներքին Չարբախի վրա «թուղթուգիր» կա՝ ամսվա սկզբին եւ վերջին այս թաղամասը պարտադիր մի քանի ժամով հոսանքազրկվում է, անձրեւոտ օրերին փողոցներում լճակներ են գոյանում, իսկ բարեգործ ու մեծախոստում «առաքյալները» հայտնվում են միայն ընտրությունների նախաշեմին:
