Ինչպես հայտնում են Միլանի համալսարանի գիտնականները, ալկոհոլի օգտագործումն արագացնում է օրգանիզմի ծերացումը եւ մեծացնում է քաղցկեղի զարգացման վտանգը: Մասնագետները պարզել են, որ սպիրտը վնասում է վաղաժամ ծերացման եւ քաղցկեղի զարգացման համար «պատասխանատու» գոտիները: Մասնավորապես, առաջացնում է սթրես եւ բորբոքում թելոմերներում՝ քրոմոսոմների ծայրային հատվածներում: Թելոմերները մարդու օրգանիզմի կենսաբանական ժամացույցն են: Դրանք կարճանում են բջիջների կիսման յուրաքանչյուր ցիկլին զուգահեռ: Երբ դրանց երկարությունը հատում է կրիտիկական կետը, բջիջները կորցնում են կիսվելու իրենց հատկությունը եւ մահանում են: Հետազոտությունն ընդգրկել է ավելի քան 250 կամավորների: Այն ցույց է տվել, որ ալկոհոլն արագացնում է թելոմերների երկարության կրճատումը: Բացի այդ, կարճ թելոմերները նպաստում են քաղցկեղի զարգացմանը:
