ՀՀ կառավարության երեկվա որոշմամբ՝ դասական աճուրդով կօտարվի նախագահի աշխատակազմի հաշվեկշռում գտնվող ՏՈՒ- 134 ԵԿ 65075 մակնիշի օդանավը: 1977 թվականին արտադրված ինքնաթիռի մեկնարկային գինը $1,6 միլիոն է: Գույքն ունի 70% մաշվածություն եւ աճուրդի է հանվում առաջին անգամ: Ընդհանրապես Հայաստանում օդանավի գնահատում կատարվում է առաջին անգամ եւ, հաշվի առնելով գնահատման օբյեկտի առանձնահատկությունները՝ գնահատման աշխատանքներում ընդգրկվել են ոլորտի լավագույն փորձագետները:
Երեկ կառավարությունը հաստատեց նաեւ Երեւանում հայ բարերարների ճեմուղի ստեղծելու ծրագիրը: Նիստի ժամանակ ՀՀ Սփյուռքի նախարար Հրանուշ Հակոբյանը նշեց, որ ճեմուղում նախատեսել են հայ բարերարներին նվիրված հուշակոթող: Չեն անտեսել նաեւ վաստակաշատ բարերարներին՝ 6 հուշակոթող էլ նվիրելու են նրանց, ովքեր մեծ ավանդ ու ներդրում են ունեցել հայոց պատմության եւ Հայաստան-Սփյուռք համագործակցության հարցում:
Առաջիկայում Հայաստանը Իսպանիայում էլ դեսպանություն կունենա: Կառավարությունը հաստատել է «Իսպանիայում Հայաստանի Հանրապետության դեսպանություն ստեղծելու մասին» նախագիծը: Նիստում ՀՀ արտաքին գործերի փոխնախարար Կարինե Ղազինյանն ասաց, որ դեսպանության հիմնումը կնպաստի հայ-իսպանական քաղաքական, տնտեսական ու մշակութային հարաբերությունների զարգացմանը: Նրա տեղեկացմամբ, գործընթացը կսկսվի հոկտեմբերից:
Երեկ պետք է քննարկվեր, սակայն անհայտ պատճառներով օրակարգից հանվել էր Հնդկաստանից Հայաստան գոմեշի մսի ներմուծման մասին նախագիծը:
Գործադիրի մեկ այլ որոշմամբ, օգոստոսի 16-ը ոչ աշխատանքային օր է, այդ օրը մեռելոց է, փոխարենը աշխատանքային օր է հայտարարվել շաբաթ օրը՝ օգոստոսի 21-ը:
