«ՀԱՏԻՍԻ» ԾՐԱԳՐԵՐԸ ՀՍՏԱԿ ԵՆ

Անցած մրցաշրջանում «Հատիս» կանանց բասկետբոլային թիմն ու ազգային հավաքականը իրենց մրցելույթներով բերկրանքի բազմաթիվ պահեր պարգեւեցին հայ մարզասերներին՝ ամիսների ընթացքում դառնալով հանրապետության լավագույն մարզական կոլեկտիվները:
Մրցաշրջան 2010-ում ակումբը, հավաքականը, բասկետբոլի ֆեդերացիայի անմիջական մասնակցությամբ, Հայաստանի մարզական կյանքն ավելի հետաքրքիր դարձնելու լուրջ ծրագրեր ունեն, որոնցից գլխավորը, թերեւս, Ռուսաստանի առաջնությանը մասնակցելու նպատակն էր: Սակայն մեզ հասած տեղեկություններով՝ հարցը դեռ առկախ է: Ինչո՞ւ, ի՞նչ պատճառով: Խնդիրները «Առավոտին» պարզաբանել է ՀՀ բասկետբոլի ֆեդերացիայի նախագահ Հրաչյա Ռոստոմյանը:
– Պարոն Ռոստոմյան, մեր նախորդ հարցազրույցում ասացիք, որ «Հատիսը» հաստատ հանդես է գալու ՌԴ առաջնությունում, ինչը Ռուսաստանի թիմերի, որոնք Եվրոպայում լավագույններից են, խաղը Հայաստանում տեսնելու հնարավորություն է ընձեռելու: Այս ընթացքում ի՞նչ է փոխվել:
– Նախ ասեմ, որ մրցաշարը կարող է այլ լինել եւ կոչվել «Նախկին Խորհրդային Միության երկրների մրցաշար»: Իսկ Ռուսաստանի ակումբային առաջնության հետ կապված խնդիրներ, իսկապես, կան: Բայց մեզ հետ որեւէ առնչություն չունեն եւ կապված են նրանց տղամարդկանց առաջնությունում ծագած մրցավարական խոշոր սկանդալի հետ: Եղելությունը հետեւյալն է. Ռուսաստանի առաջնության վճռորոշ՝ Մոսկվայի «Դինամո»- «Ունիքս» հանդիպումից առաջ «Դինամոյի», որը ՌԴ ՆԳՆ-ի թիմն է, ղեկավարությունը հանդիպումից առաջ ձայնագրել է խաղի կոմիսարի եւ Ռուսաստանի բասկետբոլի ֆեդերացիայի նախագահ Չեռնովի հեռախոսազրույցը, որում վերջինը կոմիսարից խստագույնս պահանջել է՝ երկու սուլիչ «Ունիքսի» օգտին, մեկը՝ «Դինամոյի», եւ սպառնացել հակառակ դեպքում նրան եւ մրցավարներին հեռացնել աշխատանքից: Զրույցում խոսվել է նաեւ լուրջ գումարների մասին: Կա նաեւ դրան հետեւած՝ մրցավարների հետ խոսակցության ձայնագրությունը, որի ժամանակ առաջինը կոմիսարը կատարվածը բառ առ բառ փոխանցել է մրցավարներին: Այս ձայնագրությունները տեղադրվել են ինտերնետի ամենաընթերցվող կայքերում: Հարուցվել է քրեական գործ՝ կաշառակերության հոդվածով: Իսկ երբ այս ամենը հայտնի է դարձել հանրությանը, Ռուսաստանի առաջնության 10 ակումբներ, այդ թվում նաեւ ԲԿՄԱ-ն, դուրս են եկել ֆեդերացիայից եւ ստեղծել իրենց կազմակերպությունը: Սակայն խնդիրն այն է, որ նրանք օրենքով ՌԴ առաջնություն անցկացնելու իրավունք չունեն: Ստեղծվել է այնպիսի վիճակ, որ բոլորը սպասում են աշխարհի առաջնությանը, որի ավարտից հետո կզբաղվեն հարցի քննարկումով եւ լուծումներ գտնելով: Այս ֆոնի վրա տուժում է նաեւ կանանց բասկետբոլը:
Ինչ մնում է մեզ, անկախ ամեն ինչից, մասնակցելու ենք «Եվրագավաթին» ու այսօր էլ ամենայն լրջությամբ նախապատրաստվում ենք դրան:
– Հիմա «Հատիսում» ինչո՞վ են զբաղված:
– Թիմը ներկայումս սելեկցիոն փուլում է: Գլխավոր մարզիչ Գիա Ղազանչյանը եւ մյուս մարզիչները մարզուհիների որոնումների մեջ են: Թե ֆեդերացիան, թե ակումբը յուրաքանչյուր խաղացողի ընտրելուց եւ հրավիրելուց առաջ, ինչպես ասում են, տասն անգամ չափում են, նոր մեկ անգամ կտրում: Այս աշխատաոճը մեր գլխավոր սկզբունքն է, քանի որ միջոցներն են սահմանափակ: Անում ենք այնպես, որպեսզի ամեն մի լուման ծախսվի նպատակային եւ արդյունավետ, որպեսզի այլ մարզաձեւերի պես չկանչենք երեսուն հոգու ու վերջում բոլորին էլ մերժենք: Օրինակ, անցած մրցաշրջանում «Հատիս» հրավիրեցինք յոթ լեգեոների, որոնցից վեցի դեպքում չէինք սխալվել: Իսկ այդ մեկը, դառնալով Հայաստանի հավաքականի անդամ, շատ օգնեց մեր ընտրանուն՝ միայնակ կատարելով կես թիմի դեր: Խոսքս Ամանդայի մասին է, որը փոխեց մեր ամբողջ հավաքականի խաղի որակը:
– Այսինքն, «Հատիսի» հիմնական կազմն արդեն հայտնի՞ է:
– Կորիզը կա: Բայց առայժմ ձեռնպահ մնանք կոնկրետ անուններ հայտարարելուց, որովհետեւ պայմանագրերը վերջնականապես չեն ստորագրվել՝ որոշ հստակեցման կարիք ունեն:
– Ինչի՞ մասին է խոսքը:
– Ասենք, Նոր տարվա ընթացքում բացակայության: Նման խնդիր անցած տարի առաջացավ:
– Նոր մրցաշրջանում «Հատիսի» առջեւ ի՞նչ խնդիրներ են դրված:
– Միջազգային ասպարեզում առնվազն կրկնել անցած տարվա արդյունքը, առաջնային համարել Հայաստանի ողջ տարածքում բասկետբոլ մարզաձեւի հավասարաչափ տարածումն ու զարգացումը կազմակերպելը: Մտադիր ենք սկզբնական շրջանում հանրապետության տասը մարզերի տասներկու քաղաքներում հիմնել «Հատիսի», եթե կարելի է ասել, բջիջներ: Որքան էլ ասենք, որ «Հատիսն» այսօր լավ է խաղում, դրանք սին խոսքեր կլինեն, եթե հետեւից եկողներ, նոր կադրեր չունենանք: Գերխնդիրը հետեւյալն է. անել ամեն բան, որպեսզի ապագայում հրավիրենք ոչ թե տասը, այլ արդեն չորս լեգեոներ: Հիմա «Հատիսին» երկրպագում են հազարավոր մարզասերներ, սակայն ակումբը դեռ ֆան ակումբ չունի: Այս կարեւոր ավանդույթը եւս ցանկանում ենք արմատավորել: Այլ պլաններ նույնպես կան, բայց դրանց եկեք անդրադառնանք ավելի ուշ:
– Ամփոփելով հարցազրույցի հիմնական թեման՝ կարո՞ղ ենք վերջնականապես ասել. Ռուսաստանի առաջնությանը մասնակցելո՞ւ ենք, թե՞ ոչ:
– Մենք միշտ պատրաստ ենք: Կստացվի՝ կմասնակցենք, չի ստացվի՝ չենք մասնակցի: Այս հարցով ես մշտապես կապի մեջ եմ Ռուսաստանի ֆեդերացիայում լուրջ կշիռ ունեցող մեր հայրենակից Կարեն Վազգենի Պողոսյանի հետ: Նա շատ հարցերում օգնում է մեզ, միշտ կանգնած է մեր կողքին ու պատրաստ է Հայաստանի բասկետբոլի զարգացման համար անել հնարավոր ամեն բան: Կարեն Պողոսյանի ասելով՝ Ռուսաստանի սուպերլիգան լուծարվել է, սնանկ համարվել: Նորը ստեղծելու համար մոտ վեց ամիս է պահանջվելու: Բայց պարոն Պողոսյանը վստահեցնում է նաեւ, որ առաջին իսկ չնչին հնարավորության դեպքում մեր առջեւ կանաչ ճանապարհը բաց կլինի: Ֆեդերացիայի նախագահ Չեռնովը նույնպես առայժմ չգիտի՝ մնո՞ւմ է ֆեդերացիայի նախագահի պաշտոնում, թե՞ ոչ: Մենք էլ նրանց հետ ստիպված ենք սպասել աշխարհի տղամարդկանց առաջնությանը, որտեղ հանդես է գալու նաեւ Ռուսաստանի հավաքականը: Եթե լավ հանդես գա, շատ խնդիրներ կարող են հարթվել: Թեեւ կասկածում եմ նրանց հաջողությանը, քանի որ նրանց ընտրանու հիմնական կորիզը հրաժարվել է խաղալ: