Մի քանի օր առաջ տեղեկություններ ստացանք, որ «Ավստրիական ավիաուղիների» հայաստանյան գրասենյակում ինչ-որ խառնաշփոթ է եւ ավիաընկերության լինել-չլինելու հարցն է քննարկվում: Ըստ որոշ լուրերի, «Ավստրիական ավիաուղիները» փակվելու է, իսկ ավելի ճիշտ՝ այն գնելու է ավիաշուկայում հայտնի մեկ այլ ընկերություն՝ Լյուֆթհանզան, որն էլ կիրականացնի այդ ընկերության թռիչքները:
Այս տեղեկությունը ճշտելու համար «Առավոտը» դիմեց «Ավստրիական ավիաուղիների» հայաստանյան գրասենյակի տնօրինությանը: Մեր հարցին ի պատասխան՝ ընկերությունից հայտնեցին հետեւյալը. «Ավստրիական ավիաուղիները» Լյուֆթհանզա ընկերության խմբի մեջ է 2009 թվականից: Մենք մաս ենք կազմում Եվրոպայում խոշորագույն ավիաուղիների խմբի, ինչը շահեկան է մեզ համար: Մյուս կողմից, իբրեւ կայուն բրենդ, մենք շարունակում ենք գործել Եվրոպայում եւ Միջին Արեւելքում: Հետագայում էլ «Ավստրիական ավիաուղիները» կշարունակի առաջարկել իր ծառայությունները Երեւանում՝ շաբաթական 6 թռիչքով Երեւան-Վիեննա ամառային գրաֆիկով, իր հայաստանյան գրասենյակի միջոցով»:
