«Ազատության նավատորմի» միջադեպի կապակցությամբ ստեղծված հատուկ հանձնաժողովը՝ իսրայելցի նախկին դատավոր Յակով Թուրքելի նախագահությամբ, օգոստոսի 9-ին սկսել է վկաների հարցաքննությունը, որոնց թվում է նաեւ Իսրայելի վարչապետ Բինիամին Նեթանյահուն:
Թեեւ ուղիղ հեռարձակումն արգելված է, սակայն Նեթանյահուն ցուցմունքներ է տալիս դռնբաց նիստում եւ նրա հայտարարություններն անմիջապես հրապարակվելու են: Այդ մասին փոխանցում է news.am-ը: Վարչապետի հարցաքննությունն սկսվել է օգոստոսի 9-ի առավոտյան: Նեթանյահուն հայտարարել է, թե Գազայի հատվածի ծովային շրջափակումը մտցվել է ՀԱՄԱՍ խմբավորման կողմից զենքի առաքումները Գազայի հատված կանխելու համար:
Օգոստոսի 10-ին սպասվում է, որ հանձնաժողովը կլսի պաշտպանության նախարար Էհուդ Բարաքին եւ գլխավոր շտաբի պետ Գաբի Աշքենազիին:
Հիշեցնենք, որ միջադեպը տեղի էր ունեցել մայիսի 31-ին, երբ իսրայելցի զինվորականները գրավել էին նավատորմի վեց նավերը: Արդյունքում զոհվել է թուրքական «Mavi Marmara» նավի վրա եղած ազգությամբ թուրք 9 կամավոր:
