ԼՂՀ-ի մասին պատմող գիրքը տարածման խնդիր ունի
Հայաստանում է արմատներով ղարաբաղցի մոսկվաբնակ կինոռեժիսոր, գրող Բորիս Բարատովը: Նա Հայաստան է ժամանել իր նոր «ԽՈՐՈոՈւրՍՌպ ւՐՏվՌՍՌ» գիրք-ալբոմով:
Երեկ ազգային գրադարանում հեղինակը ներկայացրեց գիրքն ու դրա հետ կապված իր մտահոգությունները: Եվ, ինչպես ինքն ասաց, գիրքը տպագրվել է, բայց մեծ խնդիրներ ունի տարածման հարցում. «Հայաստան այցելությանս նպատակն է՝ հայ օլիգարխներին եւ պաշտոնյաներին հասու դարձնել ասելիքս ու մտահոգությունս, որպեսզի նրանք տեղներից շարժվեն եւ սկսեն մտածել Ղարաբաղի հարցի մասին»:
Հեղինակը 20 տարի շարունակ զբաղվել է ղարաբաղյան հարցով եւ դրա ուսումնասիրմամբ:
Նրա փոխանցմամբ, առաջին՝ Ղարաբաղի թեմային առնչվող գիրքը եղել է «Արցախի հրեշտակը», որը տպագրվել է դեռեւս ղարաբաղյան պատերազմից առաջ: Իսկ նոր հրատարակությունը, որը տպագրվել է Իտալիայում, ամբողջովին նվիրված է Ղարաբաղի պատմությանը՝ 1988-2009 թթ.:
Բ. Բարատովի խոսքով, «ԽՈՐՈոՈւրՍՌպ ւՐՏվՌՍՌ»-ն կարեւոր նշանակություն ունի ղարաբաղյան հարցի լուծման, ադրբեջանցիների խեղաթյուրող ինֆորմացիայի ճշգրտման ու շատ այլ հարցերի համար. «Այսօր Հայաստանում ինֆորմացիոն սպեկտրը լիովին շեղվել է իր ճիշտ ուղուց: Չեմ հասկանում՝ ինչո՞վ են զբաղվում հայկական թերթերը, հրատակվող գրքերն ի՞նչ ճակատագիր են ունենում: Օրինակ՝ ադրբեջանական թերթերը տարբեր լեզուներով թարգմանվում են եւ արտահանվում, ինչո՞ւ նույնը չի արվում հայկական մամուլում: Ինչու՞ աշխարհը պետք է կարդա ադրբեջանցի լրագրողների զառանցանքները: Այս գիրքը պատվեր չէ, սրանից փողի հոտ չի գալիս, ես պատվերով չեմ աշխատել, սա իմ մտահոգությունն է: Ուզում եմ գիրքը հայտնվի այն մարդկանց, կառույցների սեղաններին, ովքեր զբաղվում են ղարաբաղյան հարցով: Հայաստանցիներն անդադար ասում են՝ Ղարաբաղ, Ղարաբաղ, բայց բոլորին մտահոգում է միայն տարածքի հարցը, ոչ ոք չի մտածում այն մասին, որ դա պետություն է, ազգ, մշակույթ, պատմություն… Խոսում եք ձեր ներսում ու միայն այն մարդկանց մոտ, ովքեր քաջատեղյակ են խնդրի մասին, դրա հետ կապված իրադարձությունների մասին: Ուզում եմ կոչ անել գոնե մեծահարուստներին, որ կարելի է ձեռք բերել գիրքը եւ տալ այն հանձնախմբերին, ովքեր բանավեճեր են անցկացնում ղարաբաղյան հարցի շուրջ: Տեսեք՝ ի՞նչ են անում ադրբեջանցիները, նրանց հեռուստաընկերությունները, մամուլը լցված է կեղծ ինֆորմացիայով, իսկ հայերի ինֆորմացիոն բլոկը քնած է»:
Գրքի տպագրման եւ տարածման խնդիրների մասին էլ ասաց. «Երբ պատրաստ էր ընդամենը գրքի մակետը, ես այն ներկայացրի Ղարաբաղի նախագահին՝ Բակո Սահակյանին, ինձ հրատարակման հարցում օգնելու նպատակով: Նա ուշադիր զննեց մակետը եւ ասաց՝ «Այո, շատ կարեւոր է, գնա Մոսկվա եւ խոսիր իմ ներկայացուցչի հետ: Գնացի նրա մոտ, ասացի՝ ով է ինձ ուղարկել եւ ինչ հարցով: Նա ուշադիր լսեց, երկար ուսումնասիրեց գրքի մակետը, եւ ասաց՝ «Այո, ցավոք, այս ամենն արդեն եղել է… Ու դա էլ ոչ մեկին պետք չէ»: Սա էլ այն մարդն է՝ ով ներկայացնում է Ղարաբաղը Ռուսաստանում… Ես թողեցի ամեն ինչ Մոսկվայում եւ մեծ դժվարությունների ու կորուստների գնով Իտալիայում հրատարակեցի գիրքը՝ ռուսերեն եւ անգլերեն տարբերակներով: Այն անպայման պետք է հայտնվի կարեւոր մարդկանց ձեռքերում ու այնպիսի մարդկանց՝ որոնք աշխատում են Ղարաբաղի հարցի լուծման ուղղությամբ…»:
