Ինչպես տեղեկանում ենք ՀՀ կրթության եւ գիտության նախարարության կայքէջից՝ երեկ ԿԳՆ-ում տեղի է ունեցել Հանրապետական ընդունող հանձնաժողովի նիստ: Նիստի օրակարգում ընդգրկված էր երկու հարց՝ Լեռնային Ղարաբաղին հատկացված նպատակային տեղերի հատկացման եւ ՀՀ պետական բուհերի անվճար եւ վճարովի տեղերի անվանական ցանկերի հաստատման վերաբերյալ հարցերը:
ՀՀ կրթության եւ գիտության նախարար, Հանրապետական ընդունող հանձնաժողովի նախագահ Արմեն Աշոտյանը տեղեկացրեց, որ ՀՀ կառավարության որոշմամբ նախորդ տարվա համեմատությամբ Լեռնային Ղարաբաղի Հանրապետությանը հատկացված տեղերն ավելացել են 10-ով: ԼՂՀ-ին հատկացված 70 տեղը լրացվել է հետեւյալ համամասնությամբ. 16 դիմորդ ընդունվել է ներբուհական, իսկ 44-ը՝ միասնական քննությունների արդյունքներով: 10 տեղ հատկացվել է ՀՀ ոստիկանական ակադեմիային: Հանրապետական ընդունող հանձնաժողովը հաստատեց նաեւ ՀՀ բուհերի անվճար եւ վճարովի տեղերի անվանական ցանկերը եւ տրամադրեց բուհերին՝ հրապարակելու համար: Այս տարի ՀՀ պետական բուհեր են ընդունվել շուրջ 11 500 դիմորդներ:
