ՊԵԿ տեղեկատվության բաժնից երեկ տեղեկացանք, որ նախաբացթողումային հսկողության վարչության աշխատակիցներն օրերս, «Ֆիրմա Նյու» մաքսային պահեստում քաշի անհամապատասխանություն են արձանագրել «Օրանժ Արմենիա» եւ «Ֆելիքս-Ալեքս» կազմակերպությունների անունով ներմուծված բեռի արտաքին տեսողական զննության ժամանակ: Պարզվել է, որ առանց մաքսային ապահովման միջոցը վնասելու՝ հնարավոր է եղել կողպեքը քանդելու միջոցով բացել բեռնախցիկը: Արդյունքում պարզ է դարձել, որ բեռի քաշը (ալյումինե լարեր եւ ավտոմեքենայի խլացուցիչներ) շուրջ 1,5 տոննայով պակաս է՝ մաքսակետում արձանագրված քաշի համեմատ: Կազմվել է մաքսային կանոնների խախտման վերաբերյալ արձանագրություն:
Նույն վարչության աշխատակիցները Մեղրիի մաքսակետում բացահայտել են մաքսանենգության այլ դեպքեր եւս. կանխվել է շուրջ 50գ թմրամիջոցի ապօրինի ներկրումը ՀՀ: Մի դեպքում՝ թմրանյութը հայտնաբերվել է Մեղրիի մաքսակետով Իրանից ժամանած քաղաքացի Ալիռեզա Ալիմիռեզայի Մուհամմադի մոտ. վերջինս թմրանյութը (սեւ գույնի ափիոնանման զանված) թաքցրել էր տաբատի գրպանում: Մեկ այլ իրանցի էլ՝ Էյվազի Բուչլուի Ամիր Գալամալին, փորձել էր թմրանյութը թաքցնել կոշիկի մեջ: Հարուցվել է քրեական գործ: Իրանի քաղաքացիները կալանավորված են:
