2007 թվականին Ոսկեւանի այն ժամանակվա գյուղապետ Էմմա Հակոբյանը՝ Ռոբերտ Քոչարյանից «Անանիա Շիրակացի» շքանշան ստանալու ժամանակ, երկրի նախագահին խնդրել էր լուծել հայրենի գյուղի գազիֆիկացման խնդիրը: Անցել է 3 տարի, սակայն հիմնահարցը չի լուծվել: Ներկայումս կազմված են Նոյեմբերյանի տարածաշրջանի սահմանամերձ 6 գյուղերի` Ոսկեւանի, Ոսկեպարի, Ջուջեւանի, Բաղանիսի, Բարեկամավանի, Կոթիի գազիֆիկացման նախագծա-նախահաշվային փաստաթղթերը, սակայն այդ գյուղերն, ամենայն հավանականությամբ, այս տարի էլ չեն գազիֆիկացվի: Տարածքի համայնքապետերից տեղեկացանք, որ գազի եւ գազիֆիկացման վերաբերյալ կոնկրետ խոստում ոչ մի պաշտոնյա չի տվել: Մինչդեռ, ներկայումս գազատարը Բաղանիս գյուղից ընդամենը 500 մ հեռավորությամբ է անցնում:
