![\"\"](\"https://www.aravot.am/2010/aravot_arm/July/30/p-7.1.jpg\")
«Սեփականաշնորհված» մուտքը
Երեկ մինչ կհասնեինք մայրաքաղաքի Լենինգրադյան փողոցի 24 շենք, որտեղից ահազանգ էինք ստացել, տարածք էին եկել այցելել քաղաքաշինության վարչության աշխատակիցները, որոնք, տեսնելով, որ վթարային շենքի 4-րդ մուտքը զավթված է, տեղում ակտ էին կազմել եւ 400 000 դրամի տուգանք նշանակել:
Այդ ակտի մասին, սակայն, իրավախախտության մեջ մեղադրվող թիվ 39 բնակարանի սեփականատերը մեզնից տեղեկացավ: Նա ասաց, որ իրեն որեւէ մեկը չի տեղեկացրել տուգանելու մասին:
Նշյալ հասցեի տարածք էին շտապել համատիրության նախագահն ու տեսուչը: Նրանք ասացին, որ բնակիչներն իրենց չեն ահազանգել եւ, փաստորեն, մուտքի գրավվման մասին տեղեկացել են 3 օր առաջ. «Մենք մի շաբաթ առաջ անցել ենք այստեղով, երկու տեսուչներով, այսպիսի բան չի եղել: Բնակիչների կողմից ահազանգ չի եղել, մենք չենք իմացել: Շինարարությունը սկսվել է, նոր են տեղեկացրել մեզ այդ մասին: Եթե քաղաքաշինությունը եղել է այստեղ, կակտավորեն ու կքանդեն»,-նշեց համատիրության տեսուչ Անդրանիկ Բադալյանը:
«Կա վերահսկողություն քաղաքապետարանի, թաղապետարանի կողմից: Համատիրությունը վերջին օղակներից է: Մենք բողոք ընդհանրապես չենք ունեցել»,- հավելեց Լենինգրադյանի համատիրության նախագահ Ա. Պետրոսյանը:
Երբ ցույց տվեցինք նույն շենքի մեկ այլ բնակչի կողմից ինքնակամ փակված գրավյալ մյուս տարածքը՝ 2-րդ մուտքը, համատիրության աշխատակիցներն ասացին, որ սեփականության վկայականով այդ տարածքը օրինականացված է:
Ապօրինի շինարարության մեջ մեղադրվող, Ստեփականակերտից 8 ամիս առաջ թիվ 39 բնակարանը գնած տիկին Կարինեն մեզ ցույց տվեց անշարժ գույքի կադաստրի կողմից հուլիսի 18-ին իրեն տրված իր բնակարանի սեփականության վկայականը: Այդ վկայականով շենքի մուտքի սեփականատերը դարձյալ տիկին Կարինեն է:
Բնակիչներից մեկը՝ զոհված ազատամարտիկի այրի, ազատամարտիկ Շուշան Աբրահամյանն ասաց, որ պատրաստ են դատի տալու կադաստրին:
