Արգիճի գետի Գայլաձոր վտակի վրա ՀԷԿ կառուցելու հարցը շարունակում է մնալ Գեղարքունիքի մարզի 5 համայնքներին հուզող թիվ 1 խնդիրը: Հիշեցնենք, որ նախորդ շաբաթ այդ համայնքների բնակիչները, որպես բողոքի նշան, փակել էին Երեւան–Մարտունի ճանապարհի մի հատվածը: Երեկ էլ նստացույցի կազմակերպիչներից Վերին գետաշենցի Պայծառ Աղաբաբյանը հեռախոսով «Առավոտին» փոխանցեց, որ սպասում են մարզպետի գրավոր պատասխանին. «Ասացին՝ մինչեւ օգոստոսի 3-ը հարցը կլուծվի, բայց ոնց երեւում է՝ ստից ձեւականությունների հետեւից են ընկած: Երեւի նորից ճանապարհները փակենք»: Մեր զրուցակիցը փոխանցեց, որ հիմա էլ ՀՀ բնապահպանության նախարարությունից մի խումբ մարդիկ են եկել այդ համայնքներ՝ ուսումնասիրելու տեղի տարածքների ջրային ու հողային ռեսուրսները: Պ. Աղաբաբյանի փոխանցմամբ՝ 5 համայնքների 2714 հա ոռոգելի տարածքից միայն 950 հեկտարն է ոռոգվում. «Իմ տնամերձ հողամասը չեմ կարող մշակել, քանի որ ջուր չկա: Եթե մեր ջրովի տարածքների 3 բաժնից մեկն է ոռոգվում, ինչո՞ւ են ջուրը կտրում–տանում Վայոց Ձոր, 100 հեկտարի համար ո՞նց եք տանում, եթե 1764 հեկտարն անջուր է մնացել»:
