Կատալոնիայում արգելվեց իսպանական հին ավանդույթը

Կատալոնիան դարձավ իսպանական առաջին տարածաշրջանը, որը լիովին արգելեց ցլամարտը: Երկրի հյուսիս-արեւելքում գտնվող ինքնավար միավորման խորհրդարանը որոշում է կայացրել, ըստ որի՝ ցլերի ավանդական մարտերը ճանաչվել են անօրինական: Արգելքի պաշտոնական հիմնավորումը կենդանիների հետ դաժան վերաբերմունքն է, թեեւ դիտորդները մատնանշում են որոշման նաեւ այլ շարժառիթ. այն է՝ շատ կատալոնացիներ ուզում են հերթական անգամ ընդգծել իրենց ազգային ինքնությունը՝ հրաժարվելով իսպանական ամենահայտնի ավանդույթներից մեկից: Այդ մասին տեղեկացնում է BBC-ին:
Ցլամարտի անցկացման կողմնակիցները պնդում են, որ ցլամարտն ազգային մշակույթի կարեւորագույն բաղադրիչներից մեկն է, որը պետք է պահպանել:
Որոշման քվեարկությունը խորհրդարանում ընթացել է փակ ռեժիմով, քանի որ կատալոնական խորհրդարանի երկու հիմնական խմբակցություններ գնացել են անսովոր քայլի եւ պաշտոնապես թույլատրել են իրենց խմբակցությունների պատգամավորներին քվեարկել՝ հիմնվելով բացառապես սեփական մոտեցումների վրա: Արդյունքում որոշումն ընդունվել է 68 «կողմ» եւ 55 «դեմ» ձայների հարաբերակցությամբ: «Կան ավանդույթներ, որոնք չեն կարող պահպանվել անփոփոխ ձեւով, քանի որ հասարակությունն ինքն է փոխվում: Մենք չենք կարող արգելել ամեն ինչ, բայց դրանցից ամենաբարբարոսականները պետք է արգելվեն»,- Կատալոնիայի խորհրդարանում տեղի ունեցած քննարկումների ժամանակ հայտարարել է Կատալոնիայի ազգային կուսակցության պատգամավորը: