Չինաստանի հարավում գործող կուսակցական դպրոցում, որտեղ սովորում են երկրի պետծառայողները, հատուկ դասընթացներ են կազմակերպվում, որոնք օգնելու են սովորողներին պայքարել կաշառք վերցնելու գայթակղության դեմ: BBC-ի մատուցմամբ, այդ դասընթացների ընթացքում, որոնք արդեն անվանվում են «հակակոռուպցիոն թայ-չի», պետծառայողները մեդիտացիայի բաղադրիչները հարկադրված են համատեղել արեւելյան մենամարտի եւ ուժային վարժությունների հետ: Չինովնիկներին կոչ է արվում օրը սկսել իրենք իրենց սուր հարցադրումներ անելուց, օրինակ՝ կկարողանայի՞ ես հրաժարվել 10 հազար դոլար կաշառքից:
Հիշեցնենք, որ Չինաստանում կոռուպցիան եւ կաշառակերությունը, որոնք մեծ տարածում ունեն, համարվում են երկրի թիվ մեկ սպառնալիքը: Երկրի իշխանությունները վերջերս պետպաշտոնյաներից պահանջել են հայտարարագրել ոչ միայն իրենց, այլեւ հարազատների եկամուտներն ու ունեցվածքը: Այս տարի երկրի վարչապետ Վեն Ցզյաբոն խոստացել էր խոշորամասշտաբ արշավ սկսել կոռուպցիայի դեմ, որը, նրա ասելով՝ «ուղղակիորեն ազդում է մեր իշխանության դիրքերի ամրության վրա»: Գրեթե ամեն շաբաթ Չինաստանում տարբեր մակարդակի պետպաշտոնյաների եւ գործարարների կոռուպցիայի մեղադրանք է առաջադրվում: Այդ մեղադրանքով այս տարվա մայիսին Չինաստանի ամենահարուստ գործարար Խուան Գուանյույը կաշառակերության եւ բանկային անօրինական գործարքներ կատարելու համար դատապարտվեց 14 տարվա բանտարկության:
