Հայաստանի գրողների միության Լոռու մասնաճյուղի հրավերով, երեկ Լոռու մարզկենտրոն Վանաձորում էին «Մենք դեմ ենք օտարալեզու դպրոցների վերաբացմանը» նախաձեռնող խմբի անդամները: Սա օտարալեզու դպրոցների վերաբացման դեմ պայքարողների առաջին այցն է Հայաստանի մարզեր: Հենց Վանաձորում էլ նրանք որոշել են, որ անկախ նրանից հրավեր կլինի, թե չէ, մարզային այցելությունների շարք են սկսելու, մարզերում հանձնախմբեր ստեղծելու:
«Մենք դեմ ենք օտարալեզու դպրոցների վերաբացմանը» նախաձեռնող խմբի անդամ Արմեն Հովհաննիսյանը Վանաձորում հայտարարեց, որ Հայաստանի եւ հայաստանցու համար կարեւոր է, որ հայկական դպրոցները շատ լինեն: Սակայն Հայաստանն ու հայաստանցին խոսում են Ջավախքում հայկական դպրոցներ ունենալու մասին ու դրան զուգահեռ՝ Հայաստանում փորձում բացել օտարալեզու դպրոցներ: Հիշեցնենք, որ օտարալեզու դպրոցներ բացելու նախաձեռնողն ու հիմնական գաղափարախոսը ծնունդով լոռեցի, ՀՀ վարչապետ Տիգրան Սարգսյանն է:
