Երեկ ԳԱԱ-ում մեկնարկեց Երիտասարդ արեւելագետների հանրապետական երկօրյա գիտաժողովը: Տարբեր նիստերի ընթացքում կքննարկվեն տարածաշրջանային հակամարտություններին, հասարակական-քաղաքական հարաբերություններին վերաբերող հարցեր: Այդ ընթացքում երիտասարդ մասնագետները «կհասնեն» մինչեւ Վանի թագավորություն, Աքեմենյան Պարսկաստան եւ այլուր: «Առավոտը» զրուցեց գիտաժողովի մասնակիցներից ոմանց հետ: ՀՀ ԳԱԱ Արեւելագիտության ինստիտուտի Իրանի բաժնի գիտաշխատող Հովհաննես Խորիկյանը, որը «Աքեմենյան Պարսկաստանի 4-րդ սատրապության էթնիկական կազմի շուրջ» վերնագրով զեկուցում էր կարդացել, մեր հարցին, թե ՀՀ-ի շուրջ ստեղծված աշխարհաքաղաքական ներկայիս իրավիճակում հայ արեւելագետների դիրքորոշումը ճի՞շտ է, պարոն Խորիկյանը պատասխանեց. «Մենք որպես գիտնականներ, առաջին հերթին պիտի ծառայենք գիտությանը»: Դառնալով Ադրբեջանի պահվածքին՝ նշեց. «Ադրբեջանցիներն ամեն քայլի դիմում են, որ ապացուցեն, թե, իբր, իրենց ծագումնաբանությունը սկսում է Աքեմենյան ժամանակաշրջանից: Ուզում են հիմնավորել, որ մեզնից առաջ են գոյություն ունեցել: Բնականաբար, սրանք ոչ թե գիտական, այլ քաղաքական ենթատեքստ ունեցող հայտարարություններ են: Այժմ ինտերնետը ողողված է նման ցածրարժեք նյութերով: Իսկ երբ շարքային քաղաքացին ցանկանում է ծանոթանալ նաեւ հայկական կողմի տեսակետին, այն չի կարողանում գտնել: Փաստորեն, մենք այժմ դեռ միայն պատասխանողի դերում ենք»: ԳԱԱ Արեւելագիտության ինստիտուտի գիտաշխատող Քրիստինե Մելքոնյանն էլ անդրադարձավ թուրք-իսրայելական հարաբերություններին: Իսկ «Առավոտի» հետ զրույցում հայ-թուրքական հարաբերությունների կարգավորման համար հետեւյալ բանաձեւն առաջարկեց. «Հիմա պիտի սպասել եւ տեսնել, թե ինչպիսի շրջադարձ կլինի, եւ քաղաքական իրավիճակն ինչպես կդասավորվի»:
