![\"\"](\"https://www.aravot.am/2010/aravot_arm/July/29/p2.jpg\")
Ասում է «Ժողովրդավարական Հայրենիք» կուսակցության նախագահ Պետրոս Մակեյանը
Երեկ Հայ ազգային կոնգրեսում տեղի ունեցած քաղաքական խորհրդի նիստում, որը վարել է ՀՀ առաջին նախագահ եւ ՀԱԿ առաջնորդ Լեւոն Տեր-Պետրոսյանը, որոշում է ընդունվել սեպտեմբերի 17-ին համապետական հանրահավաք անցկացնել, նաեւ Կոնգրեսի համապատասխան կառույցներին հանձնարարվել է ակտիվորեն զբաղվել հանրահավաքի նախապատրաստման աշխատանքներով: Կոնգրեսի այդ որոշումը ՀԱԿ-ին անդամակցող «Ժողովրդավարական Հայրենիք» կուսակցության նախագահ Պետրոս Մակեյանը համարեց «ճիշտ ժամանակին կայացված որոշում»:
Նրա ասելով, իրավիճակն այսօր բավականին բարդ է ե՛ւ արտաքին քաղաքական հնարավոր զարգացումների առումով՝ նկատի ունենալով գլխավորապես Ղարաբաղի հիմնախնդրի շուրջ տեղի ունեցող զարգացումները, ե՛ւ դրանով պայմանավորված՝ նաեւ ներքաղաքական համատեքստում, մանավանդ, որ ներքաղաքական գործընթացները, ըստ նրա, զարգանում են սոցիալական արդարության հաստատման, ամենաթողության ու օրենքի շրջանցման դեմ հասարակական տարբեր խավերի ծավալած լոկալ պայքարի ֆոնին: Ընդդիմադիր գործչի դիտարկմամբ, այդ բոլոր պրոցեսների հանրագումարը հասարակության ներսում նոր լիցքեր է կուտակում, որոնք Կոնգրեսը պետք է ճիշտ ուղղորդի՝ երկիրը օրինականության դաշտ տեղափոխելու, սահմանադրական կարգի վերականգնման եւ որպես դրա նախապայման՝ արտահերթ ընտրությունների անցկացմանը հասնելու համար: Ավելի հաճախակի հանրահավաքներ եւ զանգվածային միջոցառումներ անցկացնելու պահանջը, նաեւ ՀԱԿ-ի ներսում, վաղուց էլ կար: Ուրեմն՝ ինչո՞ւ հիմա հանրահավաքային շարժումը վերականգնելու որոշում ընդունվեց, ինչ-որ բա՞ն է փոխվել: Ըստ Պ. Մակեյանի՝ «Իրավիճակը Հայաստանում միշտ էլ պայմանավորված է եղել Ղարաբաղի հարցով, վերջին շրջանում՝ նաեւ հայ-թուրքական հարաբերություններով, տարածաշրջանային զարգացումներով:
Բայց այս հանգրվանում, ինչպես Լեւոն Տեր-Պետրոսյանն ասաց իր ելույթում, երբ Արեւմուտքը Ղարաբաղի հարցի լուծումն առաջնահերթություն չի համարում, եւ ղարաբաղյան հակամարտության ու հայ-թուրքական հարաբերությունների կարգավորման բանալին էլ գտնվում է Ռուսաստանի ձեռքում, իրավիճակը Հայաստանի համար վտանգավոր է դառնում»: Նա կարծիք հայտնեց, որ Հայաստանի համար վտանգավոր է նաեւ ԼՂ հարցում ստատուս-քվոյի պահպանումը, որը կարող է պայմանավորված լինել տարածաշրջանային ու նաեւ այդ խնդրի շուրջ գերտերությունների շահերի միջեւ եղած հակասություններով. «Այս իշխանությունների պարագայում եթե ստատուս-քվոն պահպանվի էլ, ապա զարգացումների ընթացքը բոլոր դեպքերում մեզ համար վտանգավոր է, մենք էլի տուժելու ենք: Ուստի՝ հիմա «դրսում» ստեղծված այս պաուզան մենք պետք է օգտագործենք ներքին ստատուս-քվոն փոխելու համար, եւ հանրահավաքային շարժման վերսկսումն այդ իմաստով բավականին լավ առիթ է, որպեսզի մենք կարողանանք հանրության ներսում կուտակված լիցքերը՝ թե՛ սոցիալական, թե՛ անարդարությունների առումով, ճիշտ ուղղորդել: Այդ դեպքում հնարավոր է, որ որոշակի զարգացումներ լինեն, եւ հասնենք արտահերթ ընտրությունների»:
Անդրադառնալով առաջիկայում Հայաստանում ծավալվելիք հնարավոր զարգացումներին, սահուն կերպով հերթական խորհրդարանական ընտրությունների գնալու հեռանկարին՝ Մակեյանը ասաց, որ սեպտեմբերին կայանալիք հանրահավաքը եւ Կոնգրեսի հետագա անելիքները ցույց կտան՝ առաջիկա ընտրությունները հերթակա՞ն, թե՞ արտահերթ կլինեն, իսկ առայժմ, նրա ասելով՝ դեռ վաղ է դրա մասին խոսել: Երեկ իր ասուլիսում ՀՀԿ-ական պատգամավոր Գալուստ Սահակյանը հայտարարել է, թե ո՛չ ՀՀՇ-ն, ո՛չ էլ ՀԱԿ-ը խորհրդարան մտնելու հնարավորություն չունեն: Հիշեցնենք, որ ավելի վաղ՝ ՀՀՇ համագումարից առաջ, նա մամուլում հայտարարել էր, որ «եթե ՀՀՇ-ն ցուցակ ներկայացնի՝ խորհրդարանում տեղեր կունենա: ՀՀՇ-ն, բայց ո՛չ ՀԱԿ-ը»: Նա նաեւ հավաստիացրել է, թե ՀՀՇ համագումարը ցույց տվեց, որ այդ կուսակցության վերաբերյալ իր վերոհիշյալ դիտարկումներն այլեւս ժամանակավրեպ են: Արդյոք Գ. Սահակյանի այս վերջին սրբագրումները պայմանավորված էին ՀՀՇ համագումարից հետո այդ կուսակցությունում իշխանությունների ազդեցությունը կորցնելու եւ ծրագրված վնասարարությունը չեզոքացնելու հանգամանքո՞վ: Ի պատասխան մեր այս հարցին՝ Պետրոս Մակեյանը նետեց. «Ինչո՞ւ, Գալուստ Սահակյանը մեր ժամանակների Նոստրադամո՞ւսը, թե՞ Ահարոն Ադիբեկյանն է: Եթե դա նրա ցանկությունն է, կամ նա խոսել է կլանի պահպանման բնազդից ելնելով՝ հասկանալի է: Բայց իրեն ո՞վ է հարցնելու՝ մտնի՞, թե՞ չմտնի խորհրդարան: Կարծում եմ՝ այդ հայտարարությունը ՀՀՇ-ում տեղի ունեցած գործընթացների հետ կապ չունի. դա ընդամենը Գալուստ Սահակյանի ցանկությունն է, որը ցանկություն էլ կմնա»:
