Գեղարքունիքի մարզպետարանից տեղեկացանք, որ հուլիսի 22-ին մարզպետ Նվեր Պողոսյանի գլխավորած պատվիրակությունը եռօրյա այցով մեկնել է Ռուսաստանի Դաշնության Օմսկի մարզ: Օմսկի մարզում այսօր բնակվում է մոտ 50 հազար հայ, որից 18 հազարը՝ Գեղարքունիքի մարզից: Մարզպետարանի պատվիրակությունը Օմսկի նահանգապետ Լ. Պոլեժաեւի հրավերով է մեկնել՝ առեւտրատնտեսական եւ կրթամշակութային կապեր հաստատելու, արդյունաբերության, գյուղատնտեսության, տուրիզմի, մշակույթի, առեւտրի եւ այլ ոլորտներում համագործակցություն հաստատելու համար: Ըստ Գեղարքունիքի մարզպետարանի աշխատակազմի զարգացման ծրագրերի եւ վերլուծության բաժնի վարիչ Վարդուհի Մնացականյանի՝ այցի հետ կապված բոլոր ֆինանսական ծախսերը հոգալու է Օմսկի մարզի հայկական համայնքը: Այցը Գեղարքունիք եւ Օմսկ մարզերի միջեւ համագործակցության հաստատմանն ուղղված առաջին գործնական քայլն է:
