Գեւորգ Մարզպետունին գրող է կամ Անուշն ամուսնանում է

Սրանք «գոհարներ» են դիմորդների մտքերից

Երեկ հայոց լեզու եւ գրականություն (բանավոր) առարկայից քննություն հանձնեց 59 դիմորդ, անգլերենից (բանավոր)՝ 103: «Առավոտի» շրջայցը քննակենտրոններով ցույց տվեց, որ անգլերենի պարագայում գերիշխում է դիմորդների միջին մակարդակը, իսկ հայոց լեզու եւ գրականություն առարկայից գրանցվել են հիմնականում ծայրահեղ լավ կամ ծայրահեղ վատ գիտելիքներով երեխաներ: «Առավոտի»՝ քննակենտրոնում ներկա գտնվելու պահին անգլերենի քննությունից մի դիմորդ լացակումած դուրս եկավ, ասելով, որ «11» է ստացել, բայց ինքն ավելի բարձրի էր արժանի: Հանձնաժողովի նախագահ, ԵՊՀ անգլերենի թիվ 1 ամբիոնի վարիչ Մարգարիտա Ապրեսյանն ասաց. «Այս տարի դիմորդների գիտելիքները մեզ չեն գոհացնում: Տարիներ առաջ պայծառ երեխաներ շատ կային, այսօր այդպիսիք միայն այն երեխաներն են, որոնք ուսանել են արտասահմանում: Միայն մի քանի դիմորդ է եղել, որ ՀՀ պայմաններում կարողացել է զարգացնել բանավոր խոսքը: Ամեն ինչի համար չարժե երեխաներին մեղադրել, գուցե ոմանց մարզում ընդամենը մեկ անգլերենի մասնագետ կա: Մանավանդ շրջանների երեխաները չեն հասկանում, որ ոչ թե անգիր արած պիտի խոսեն, այլ կարողանան օգտագործել անգլերենի բառապաշարը»: Անգլերենի քննությունը կավարտվի հուլիսի 26-ին, իսկ մինչ այժմ «20» միավոր է ստացել ընդամենը 6 դիմորդ: Մ. Ապրեսյանի փոխանցմամբ՝ կան նույնիսկ դիմորդներ, որոնք կարծում են, թե ԱՄՆ-ի մայրաքաղաքը Անգլիան է:
Անգրագիտության առումով պատկերն ավելի ցայտուն է հայոց լեզու եւ գրականություն առարկայից: Հանձնաժողովի նախագահ, ԵՊՀ հայ գրականության ամբիոնի վարիչ Սամվել Մուրադյանն ու հանձնաժողովականները ներկայացրեցին քննության ընթացքում գրանցված դիմորդների անգրագիտության առկայծումներից: Օրինակ՝ դիմորդներից մեկը հանձնաժողովին փորձել է համոզել, որ Դ. Դեմիրճյանի «Վարդանանք» պատմավեպը գրել է Գեւորգ Մարզպետունին, մեկն էլ խնդրել է, որ Սեւակից հարցերը լինեն, քանի որ նրա գյուղից է: Երբ հանձնաժողովի նախագահը հարցրել է՝ ինչ չափով է Սեւակին ծանոթ, պատասխանել է, թե իրենց տան բոլոր սենյակները զարդարված են նրա լուսանկարներով: Հանձնաժողովի նախագահը երանի է տալիս, որ լուսանկարների փոխարեն դիմորդի գլուխը զարդարված լիներ Սեւակի մտքերով ու բանաստեղծություններով: Մեկ ուրիշ դիմորդ էլ պնդել է, թե «Հայկ եւ Բել» առասպելի իրադարձությունները կատարվել են 5-6-րդ դարերում, իսկ Սեւակի «Անլռելի զանգակատուն» պոեմում ներկայացված են «450-451թթ. արյունոտ պատերազմները»: Մի «4» միավոր ստացած դիմորդի էլ, երբ հանձնաժողովականները խնդրել են ստորագել, նա գրել է՝ «տաղանդ», զարմացած հանձնաժողովականներին ասելով, թե դա իր ստորագրությունն է եւ թե «հետո կտեսնեք՝ ես ով եմ»: «Գրագետ» դիմորդների մեկնաբանմամբ, Հ. Թումանյանի «Անուշ» պոեմում ներկայացված է Անուշի հարսանիքը, որի ժամանակ իբր փեսան ու հարսի եղբայրը պիտի կռվեն: Հետո էլ ինքն իրեն ուղղել է, թե «հարսանիքը չէր, նշանդրեքն էր»: Ս. Մուրադյանն ասաց. «Մինչ այժմ երկու «20» ենք նշանակել, մի քանի «19», «18»: Այդ փայլուններից երեքը տղաներ են: Ու բարձր գնահատականներ ստացել են հիմնականում մարզերի երեխաները՝ Չարենցավանից, Իջեւանից: Քննություն հանձնած 500 դիմորդից մոտ 130-ը անբավարար է ստացել: Մարդիկ դիմում են բանասիրության կամ լրագրության ֆակուլտետ՝ գիրք չկարդացած»: