![\"\"](\"https://www.aravot.am/2010/aravot_arm/July/24/p1.jpg\")
«Ես ընդհանրապես չեմ կարեւորում այդ տեսակետը»,- երեկ «Փաստարկ» ակումբում այսպես է արձագանքել ՀԱԿ համակարգող Լեւոն Զուրաբյանը
«7օր»-ի խնդրանքին՝ անդրադառնալ «Ժառանգություն» կուսակցության արտահերթ համագումարում Րաֆֆի Հովհաննիսյանի այն հայտարարությանը, թե մարտի 1-ի կապակցությամբ պիտի հարցաքննվեն «Հայաստանի Հանրապետության 2-րդ, ապա եւ՝ 3-րդ, ապա եւ՝ 1-ին նախագահները»: Լեւոն Զուրաբյանը հավելել է, թե մարտի 1-ի վերաբերյալ բոլոր բացահայտումներն արված են, փաստահավաք խումբն աշխատել է. «Արդեն ակնհայտ է բոլորի համար, որ դա հանցագործություն էր, որը գործված էր ռեժիմի կողմից։ Եթե ինչ-որ մարդիկ դեռ կասկածներ ունեն, գոնե այդ դեպքում կասեի՝ թող խորհրդակցի իր կուսակցության կողմից փաստահավաք խմբում ներկայացված փորձագետի հետ»: ՀԱԿ համակարգողը նաեւ ասել է. «Հիմա այդ հարցաքննությունները ձեւական բան են, որովհետեւ որեւէ հարցաքննություն ոչ մի բան չի բացահայտի, քանի դեռ այս իշխանություններն են իշխանության գլուխ եւ ամեն ինչ անում են՝ քողարկելու համար ճշմարտությունը։ Բայց վստահ եղեք, որ երբ Հայաստանում լինի ժողովրդավարական իշխանություն, բոլորը կհարցաքննվեն՝ համապատասխան Հայաստանի օրենքների»:
