ՊԱՐՏՔԵՐ Է, ՈՐ ԿՈՒՏԱԿՈՒՄ ԵՆ

Տարածքային կառավարման փոխնախարարը մարզպետների հնարավոր փոփոխությունների մասին տեղեկություն չունի

Հայաստանի որոշ համայնքներում, ըստ ՀՀ տարածքային կառավարման առաջին փոխնախարար Վաչե Տերտերյանի, աշխատավարձի գծով պարտքերը գերազանցել են համայնքային բյուջեի ծավալները: Երեկ լրագրողների հետ հանդիպման ժամանակ ամփոփելով 2010-ի առաջին կիսամյակը, պարոն Տերտերյանը նշեց, որ համայնքների՝ աշխատավարձի եւ սոցիալական վճարների գծով 1996-2007թթ. կուտակած պարտքը հասել է 2,3 միլիարդ դրամի: Այս տարվա հունվարի 1-ի դրությամբ, համայնքներում աշխատավարձի պարտքը կազմել է 843,5 միլիոն դրամ, որի մի մասը հուլիսի 15-ի դրությամբ մարվել է, բայց դրանով պարտքերը չեն պակասել: Միայն այս տարի կուտակվել է 32,866 միլիոն դրամ պարտք:

Փոխնախարարի բնորոշմամբ՝ «այս պարտքերի զգալի մասը թափթփված եւ ոչ պատշաճ աշխատանքի արդյունք է, որովհետեւ բյուջետային ծախսերի առումով նման բան չպետք է լիներ»: Պարտքերի առումով ծանր իրավիճակում են Շիրակը, Գեղարքունիքը, Արագածոտնը, Արմավիրը: Վաչե Տերտերյանը նկատեց, որ պարտքերը փակելու հարցում այս տարի Գեղարքունիքը ամենաակտիվն է եղել, աճի տեմպեր են նկատելի նաեւ Շիրակում. «Չմոռանանք, որ այս մարզերը սոցիալ-տնտեսական եւ գյուղատնտեսական առումով մյուս մարզերի համեմատ ավելի վատ վիճակում են, ավելի ռիսկային: Բայց, իհարկե, նույն մարզում, նույն ռիսկային գոտում կան հարեւան համայնքներ, որոնցից մեկը ունի կայուն կազմակերպված աշխատակազմ եւ տեղական ինքնակառավարում, մյուս համայնքում նույնը չենք արձանագրում եւ այստեղ ման գալ այլ պատճառներ՝ դժվար է: Սա նշանակում է, որ համայնքի ղեկավարը եւ ավագանին ներդաշնակ չեն, աշխատունակ չեն»:

Բյուջեի կատարման հարթությունում օրինակելի մարզերից են Կոտայքը, Արարատը, Վայոց ձորը, որոնց վերջին շրջանում փորձում է միանալ նաեւ Շիրակը. «Այստեղ աշխատավարձերի ավանդական պարտքեր չեն կուտակվում»: Պարոն Տերտերյանը նաեւ նշեց, որ կան մի շարք համայնքներ, որոնց եկամտային ունակությունները շատ թույլ են եւ այնտեղ ոչ մի կերպ իրատեսական բյուջե պլանավորել չի լինում: Փոխնախարարի ներկայացմամբ, ՀՀ համայնքների եկամուտները, այս տարվա առաջին կիսամյակի տվյալներով, նախատեսված 11,2 միլիարդ դրամի փոխարեն կազմել են 9,7 միլիարդ դրամ՝ նախորդ տարվա նույն ժամանակահատվածի համեմատ՝ 25% աճ: Հողի հարկի հավաքագրումը կատարվել է 81,2%-ով, ինչը նախորդ տարվա համեմատ աճել է 11,3%-ով: Մեր համայնքները լավ ցուցանիշներ են արձանագրել նաեւ գույքահարկի հավաքագրման հարցում՝ 90,3% կատարողական, ինչը նախորդ տարվա նույն ժամանակահատվածի համեմատ ավելի է 33,8%-ով: Գույքի վարձակալությունից եկամուտների հավաքագրումը իրականացվել է 78,2%-ով՝ նախորդ տարվա ցուցանիշից 21,5%-ով ավելի:

Արարատի եւ Շիրակի մարզպետների անսպասելի փոփոխությունների մասին էլ ՀՀ տարածքային կառավարման առաջին փոխնախարար Վաչե Տերտերյանը ասաց. «Քաղաքական որոշում էր եւ ոչ թե վատ գործունեության պատճառ»: Պարոն Տերտերյանը չգիտեր, թե առաջիկայում նման փոփոխություններ էլի կլինե՞ն, թե՞ ոչ: