![\"\"](\"https://www.aravot.am/2010/aravot_arm/July/21/p4.jpg\")
Հանցագործություն. ԱԺ բնապահպանական, սոցիալական եւ առողջապահական հարցերով մշտական հանձնաժողովի նախկին նախագահ Գագիկ Թադեւոսյանը երեկ լրագրողների հետ հանդիպման ժամանակ այսպես բնորոշեց Արգիճի գետի Գայլաձոր վտակի վրա ՀԷԿ կառուցելու՝ պատկան մարմինների քայլը: Հիշեցնենք, որ օրերս խնդրի առնչությամբ Գեղարքունիքի մարզի 6 համայնքների բնակիչները որպես բողոքի նշան 4 ժամ փակ էին պահել Երեւան-Մարտունի ճանապարհը: ՄԱԿ-ի փորձագետ, բնապահպան Քնարիկ Հովհաննիսյանը, «Շողեր» միության նախագահ Հասմիկ Ասլանյանը, Գավառի տեղեկատվական-բնապահպանական «Օրհուս» կենտրոնի համակարգող Լիաննա Ասոյանը իրենց մտահոգությունն էին հայտնում, որ Արգիճի գետի հունը փոխելու եւ ջուրը Վայոց ձոր ուղղելու դեպքում 30 հազար բնակիչ եւ 6500 հա ոռոգելի տարածք մնալու է առանց ջրի, դրանից զատ, վտանգ է սպառնալու որոշ ձկնատեսակների՝ հատկապես իշխանին, որովհետեւ Գայլաձորը միակ վտակն է, որտեղ իշխանը ձվադրում է, իսկ սա բերելու է «արտագաղթի»: Չնայած ՀՀ բնապահպանության նախարարության բնապահպանական տեսչության կողմից հնչող հայտարարություններին, թե ՀԷԿ-ի կառուցման աշխատանքները կասեցված են, բանախոսների փոխանցմամբ՝ Վայոց ձորի մարզում շինարարությունը մեծ թափով շարունակվում է, իսկ Գեղարքունիքում այն արդեն ավարտված է: Ըստ Գ. Թադեւոսյանի, այս քայլով կոպտորեն խախտվում է «Սեւանի մասին» ՀՀ օրենքը, ՀՀ ջրային օրենսգիրքը, ինչպես նաեւ «Անապատացման դեմ» ՄԱԿ-ի կոնվենցիան, որին Հայաստանը միացել է. «ՀԷԿ-եր կառուցելու եւ ջուրը խողովակներով Վայոց ձոր տանելու փոխարեն, մաքրիչ, զտիչ կայաններ կառուցեք, որ Սեւանի մեջ կեղտաջրեր չլցվեն: Սեւանը մեր միակ ազգային հարստությունն է եւ այն պետք է պահպանել ոչ թե որպես ջրամբար, այլ նախեւառաջ խմելու ջրի աղբյուր»: Գ. Թադեւոսյանը մի շարք հարցեր է ուղղում՝ ինչո՞ւ խնդրին չի «խառնվում» նախագահի աշխատակազմին կից Սեւանի հարցերով հանձնաժողովը, ինչո՞ւ է լռում հանրապետության նախագահ Սերժ Սարգսյանը, ինչո՞ւ նախագահին չեն զեկուցում ՀԷԿ-ի կառուցման եւ դրա՝ հետագայում ի հայտ եկող վատ հետեւանքների մասին: Ինչո՞ւ է ստեղծվել Սեւանի հարցերով հանձնաժողովը, եթե այն չպիտի հետեւողականություն ցուցաբերի Արգիճիում ՀԷԿ-ի կառուցման հետեւանքով բազմաթիվ ձկնատեսակների վերացման հարցին. «2001-2010թթ. կառավարությունը՝ ի դեմս բնապահպանության նախարարության, ոչ մի քայլ չի ձեռնարկել, որպեսզի 30 տարվա համալիր ծրագրից գոնե մի կետ կատարվի: Ո՞վ է թերացել, որ 2800 հա անտառից 870 հա-ը ջրի մեջ է, ինչո՞ւ ժամանակին անտառը չի մաքրվել»:
Ք. Հովհաննիսյանը կարծում է. «Մենք էներգիայի պակաս չունենք, մենք ունենք մարդկային ռեսուրսի, ջրային ու հողային ռեսուրսների դեֆիցիտ, եթե փակենք Արգիճիի ճանապարհը դեպի Սեւան, ունենալու ենք անապատացման խնդիր: Երբեք չի կարելի կշեռքի նժարին դնել Սեւանը եւ մի քանիսի շահերը»:
Լ. Ասոյանը հայտնեց, որ խնդրի լուծման ակնկալիքով հունիսի 13-ին նամակով դիմել են ՀՀ նախագահին, սակայն պատասխան չեն ստացել. «Ստացվում է, որ մենք այսքան ջուր ենք բերում Արփա-Սեւանով ու հեշտությամբ նույն ջուրն ուղղում Արփա, այսինքն՝ Ադրբեջան, թշնամուն օգուտ ենք տալիս, բայց մեր ժողովրդին թողնում ենք, որ իրենց հողը թողնեն, օտար երկիր գնան»:
