Գեղարքունիքի մարզպետարանում կայացել է 2010-ի առաջին կեսը ամփոփող նիստ, ուր արձանագրվել է, որ թեեւ 6 ամիսների կտրվածքով տեղական բյուջեների սեփական եկամուտները մարզում հավաքագրվել են 81.8 տոկոսով, ինչը 95 մլն դրամով ավելի է նախորդ տարվա նույն ժամանակահատվածի ցուցանիշից, սակայն խնդիրներ դեռ կան: Գեղարքունիքի մարզպետարանի աշխատակազմի տեղական ինքնակառավարման մարմինների եւ հանրապետական գործադիր մարմինների տարածքային ծառայությունների համակարգման վարչության պետ Իվան Ասատրյանը տեղեկացրել է, որ Գեղարքունիքի մի շարք համայնքներում ժամանակին չեն հրավիրվել ավագանու նիստեր, որոշ նիստեր արձանագրվել են ոչ լիարժեք, նկատվել են նաեւ «Գնումների մասին» ՀՀ օրենքի խախտումներ:
Գեղարքունիքի մարզի դատախազ Վահրամ Մարգարյանն էլ ասել է, որ մարզի շատ համայնքներում տեղի է ունենում հանքերի ապօրինի շահագործում, եւ պետությունը վնասներ է կրում: Միակ համայնքը, որի վարչական սահմաններում խստորեն պահպանվում են ընդերքի շահագործման եւ հողօգտագործման կանոնները՝ Գեղհովիտ գյուղն է:
