«Համերգի ծրագիրը սրտովս է»

Երեկ «Արամ Խաչատրյան» համերգասրահում երիտասարդ դաշնակահարուհի, կոնսերվատորիայի պրոֆեսոր Ռ. Թանդիլյանի ասիստենտ Արուս Աճեմյանը Հայաստանի պետական ֆիլհարմոնիկ նվագախմբի ընկերակցությամբ (դիրիժոր՝ Էդ. Թոփչյան) հանդես եկավ Գրիգի միակ հանրահայտ կոնցերտի մեկնաբանմամբ: Ա. Աճեմյանը համերգից առաջ փոքրիկ հարցազրույց տվեց «Առավոտին»:

Շուրջ 15 տարի է՝ դաշնակահարուհին մենահամերգներով հանդես է գալիս ինչպես Հայաստանում, այնպես էլ արտերկրում, ունեցել է նաեւ արտերկրյա երկարատեւ համերգային ուղեւորություններ: Օրինակ, 2003-ին Մոսկվայի կամերային նվագախմբի հետ (դիրիժոր՝ Կ. Օրբելյան) 6 համերգ է ունեցել Բրազիլիայում եւ Ուրուգվայում: Դաշնակահարուհին ասաց, որ աշնան սկզբին Հայաստանի պետական երիտասարդական նվագախմբի (դիրիժոր՝ Ս. Սմբատյան) հետ համերգից հետո պատրաստվում է դարձյալ համերգային երկարատեւ ուղեւորության, այս անգամ՝ եվրոպական երկրներ: Երիտասարդ արվեստագետի շահած տեղական եւ միջազգային մրցանակներն այնքան են, որ պարզապես տեղի պատճառով չենք հրապարակում: 2009-ին Ա. Աճեմյանն արժանացել է ՀՀ նախագահի մրցանակին: AMS ճանաչված ֆիրման թողարկել է դաշնակահարուհու ձայնագրություններով «Romantic Fire» CD-ն:

Իմանալով, որ հայրը՝ կոմպոզիտոր Վարդան Աճեմյանը երկու հրաշալի դաշնամուրային կոնցերտների հեղինակ է, որից երկրորդը Արուսը հնչեցրեց հոր 50-ամյակին նվիրված հոբելյանական երեկոյին, իսկ առաջինին այդպես էլ դեռ չի մոտեցել, հետաքրքրվեցինք՝ ինչո՞ւ այս համերգին չհնչեց Կոնցերտ-պոեմը: «Այս համերգի ծրագիրն ինձ առաջարկել է Ֆիլհարմոնիկի գեղարվեստական ղեկավարը, այն, ճիշտն ասած, իմ սրտով է: Ինչ վերաբերում է հորս ստեղծագործությանը, իրեն էլ եմ խոստացել, որ շուտով այն կհնչեցնեմ»,- ասաց դաշնակահարուհին: