Մենք ու Համաշխարհային թվային գրադարանը
ԱՄՆ Կոնգրեսի գրադարանում հունիսի 21-ին տեղի ունեցավ «Համաշխարհային թվային գրադարան» (ՀԹԳ) թեմայով սեմինար, որին մասնակցում էին ԱՊՀ մի շարք երկրների` Հայաստանի, Ղրղըզստանի, Բելառուսի, Ղազախստանի, Մոլդովայի, Տաջիկստանի, Թուրքմենստանի, Ուկրաինայի, Ուզբեկստանի, Վրաստանի, Ադրբեջանի ազգային գրադարանների, կրթամշակութային այլ հաստատությունների տնօրեններ, պատվիրակություններ: Հայաստանը ներկայացնում էին Ազգային գրադարանի տնօրեն, Հայկական գրադարանային ասոցիացիայի նախագահ Դավիթ Սարգսյանը եւ Մատենադարանի փոխտնօրեն Շուշանիկ Խաչիկյանը: Սեմինարի սկզբում կազմակերպիչները մասնակիցներին են ներկայացրել Համաշխարհային թվային գրադարանի էությունը, նպատակը: Քննարկման ընթացքում մասնակից երկրների ներկայացուցիչները ներկայացրել են իրենց ղեկավարած մշակութային հաստատությունը, քննարկվել են ցանցում ներառվելու համար անհրաժեշտ քայլերը: Յուրաքանչյուր ազգ իր մայրենի լեզվով նյութը ներկայացնում է Համաշխարհային թվային գրադարանին, այն թարգմանվում է 7 միջազգային լեզվով` արաբերեն, չինարեն, անգլերեն, ֆրանսերեն, պորտուգալերեն, ռուսերեն եւ իսպաներեն` հասանելի դարձնելով աշխարհին, եւ տեղադրում ցանցում:
Թվային գրադարանի ստեղծման համար 4 տարի է պահանջվել: Նախագծի հեղինակը ԱՄՆ Կոնգրեսի գրադարանի տնօրեն Ջեյմս Բիլինգթոնն է: Համաշխարհային թվային գրադարանի խնդիրը աշխարհի տարբեր երկրների մշակութային ժառանգությունը` սկսած գրքերից մինչեւ երաժշտական ձայնագրություններն ու ճարտարապետական գծագրերը, քարտեզներն ու տպագիր ժառանգությունը, լայնորեն եւ անվճար բոլորին հասանելի դարձնելն է: Համաշխարհային թվային գրադարանի հետ այսօր համագործակցում է աշխարհի շուրջ 50 երկիր: Այս ցանցին անդամակցող պետությունը հնարավորություն ունի աշխարհին ներկայացնել իր երկրի մշակութային եւ պատմական փաստաթղթեր, քարտեզներ, գրքեր, ձեռագրեր, այլ նյութեր` ճանաչելի դառնալով ողջ աշխարհում:
Նշենք նաեւ, որ Հայաստանի ազգային գրադարանը ներկայացված է համաեվրոպական (Europeana) գրադարանում, որտեղ տեղադրված են նյութեր աշխարհի հարյուրավոր գրադարաններից, արխիվներից ու թանգարաններից:
Կոնգրեսի գրադարանում հայերն ունեն ուրույն հավաքածու: Այստեղ Հայաստանը ներկայացված է իր անտիկ եւ միջնադարյան եզակի հարուստ մշակույթով, այլ նյութերով:
Ներկայումս Կոնգրեսի գրադարանում կա ավելի քան 26 հազար հայալեզու կամ Հայաստանին նվիրված, նրա մասին պատմող գրավոր վկայություն: Դրանք ներկայացված են Աֆրիկայի եւ Մերձավոր Արեւելքի գրականության բաժնի Մերձավոր Արեւելքի մասնաճյուղում:
