Բնակարանի կարիք ունեցող ցածր եւ միջին եկամուտ ունեցող ընտանիքներին մատչելի բնակարանով ապահովելու խնդիրը մասամբ լուծում է նաեւ հայ-հոլանդական համատեղ «Սոցիալական բնակարանային ծրագիրը»:
Այն իրականացվում է Տավուշի եւ Սյունիքի մարզերում ու Երեւանում: Երեկ լրագրողների հետ հանդիպման ժամանակ Սյունիքի փոխմարզպետ, ծրագրի աշխատանքային խմբի անդամ Արա Դոլունցը նշեց, որ Սյունիքում ավելի քան 800 ընտանիք աջակցության կարիք ունի: Նա հիշեցրեց, որ առաջին ծրագիրը մեկնարկել էր 2006-ին, իսկ 2 տարի անց վարձակալության է տրվել 2 շենք՝ 14 բնակարաններով. «Բնակարանային ֆոնդը չի սեփականաշնորհվում, այն համարվում է համայնքի սեփականությունը, բնակարանում ապրող ընտանիքը հետագայում ֆինանսական կայունություն ապահովելով ու սեփական բնակարան գնելով՝ ազատված բնակարանային ֆոնդը համայնքային իշխանությունը տրամադրում է կարիքավորության հերթում գտնվող հաջորդ ընտանիքներին»: Սոցիալական բնակարանային հիմնադրամի տնօրեն Արա Նազինյանն էլ ասաց, որ եթե շահառուն ամբողջ կյանքում հնարավորություն չունենա իր համար բնակարան գնել, կմնա այս ծրագրի մշտական շահառու:
