Երեկ՝ կառավարության նիստի հերթական օրը, կառավարության շենքի մոտ բողոքի ակցիա էին կազմակերպել Հյուսիսային պողոտայի բնակիչները, զորամասերում սպանված զինվորների հարազատներն ու 2001թ. մայիսի 17-ին Իրանի Իսլամական Հանրապետությունում վթարի ենթարկված՝ «Հայկական ավիաուղիներին» պատկանող ինքնաթիռի զոհված օդաչուների հարազատներն ու մի խումբ նախկին օդաչուներ: Նրանք դժգոհում էին, որ 2-4 տարի է՝ չեն ստանում ցմահ նշանակված փոխհատուցումը: Նախկին օդաչուների ներկայացմամբ՝ երբ լուծարվեց «Հայկական ավիաուղիները», իրենք այլեւս ոչ մի կոպեկ փոխհատուցում չեն ստացել:
Չնայած կառավարությունը Երեւանի քաղաքապետին թույլատրել է Հյուսիսային պողոտայի նախկին բնակիչների հետ կնքված 115 պայմանագրերից 34-ում փոփոխություններ եւ լրացումներ կատարել, իրացման գոտու բնակիչները դա համարում են ոչ լիարժեք լուծում:
